لا يوجد أخطر من رجل عاد من الموت.. قصة سيباستيان هالر بطل أفريقيا مع الكوت ديفوار

مسيرته:

 هالر هو مهاجم نادي بروسيا دورتموند الألماني حاليًا.. وقبلها كان في أياكس أمستردام الهولندي  لحد 2022.. وقبلهم وست هام يونايتد الإنجليزي من 2019 لـ 2021 وكان له رحلة مع نادي آينتراخت فرانكفورت الألماني من 2017 لـ 2019 وكمان  تجارب  بين الدوري الفرنسي والدوري الهولندي.. بداية تألقه كانت  مع أياكس.. من بداية انتقاله لبروسيا دورتموند الصراع ماكانش مع التأقلم في المكان والنادي وإنه يندمج مع الفريق ولكن كان أكبر من كده بكتير.. الصراع كان مع السرطان! 

 

الصراع مع المرض:

في يوليو 2022 بيعلن نادي بروسيا دورتموند إصابة هالر  بورم سرطاني بعد أيام فقط من التوقيع معاه.. اللاعب مالحقش يلعب أي مباراة مع الفريق وبدأ رحلة العلاج مع المرض بإنه خضع لعملية جراحية مع العلاج الكيماوي ونجح في إنه ينتصر على المرض ورجع في يناير 2023 مرة تانية عشان يكمل مسيرته مع نادي بروسيا دورتموند ومنتخب بلاده كوت ديفوار.. 

الانتصار:

الرجوع بعد المرض ماكانش سهل لأن فريقه كان محتاج يكسب آخر ماتش قدام فريق “ماينز” في الدوري الألماني موسم 2022/2023 عشان يقدر يكسب الدوري ولكن فريقه اتعادل 2-2 وهو ضيع ضربة جزاء!

بعد كده بيبدأ الموسم الجديد سواء مع فريقه أو مع منتخب بلاده وهنا لحظة انتصار تانية كبيرة في حياته.. 

بطل أمم أفريقيا 2023

مدرب منتخب كوت ديفوار ” جان لويس جاسكيه” خد انتقادات كتير عشان استدعى هالر ولاعب كمان اسمه أدينجرا عشان عندهم إصابة ومش جاهزين لبداية البطولة لكنه قال هنحتاجهم في الأدوار الاقصائية.. في الوقت اللي المنتخب كان خلاص بيخرج من البطولة ومش معاه غير 3 نقط وفي انتظار معجزة عشان بس يصعد من أحسن توالت بيتم إقالة المدرب وبييجي مكانه الإيفواري “إيمرسي فاي” اللي كان مساعد المدرب جان لويس واتعين مدير فني مؤقت عشان يكمل الأدوار الاقصائية بعد الصعود اللي كان سبب كبير فيه حارس مرمى منتخب غانا!

بعد ما عدوا من دور الـ 16 ودور الـ 8 ونص النهائي.. بيحصل الانتصار الكبير لهالر ورفاقه في المنتخب في النهائي قصاد نيجيريا.. في البداية كانوا خسرانين 1-0 في الدقيقة 38′ بيبدأ الشوط التاني ويتعادل منتخب الكوت ديفوار عن طريق فرانك كيسي في الدقيقة 62′ وكمان بتيجي قصة البطل.. في الدقيقة 81′ هدف لسيباستيان هالر من صناعة أدينجرا وبيختم البطولة أفضل ختام عشان يبقى الرجل اللي عاد بعد الصراع مع المرض!

Related Articles

Back to top button