لعبة eFootball الأسوأ في عام 2021.. وأخبار تانية في الملخص الأسبوعي
مساء الفل.. لو ماجربتش لعبة “Overwatch” قبل كده، فشركة “Blizzard” بتيح الفرصة اللطيفة دي للاعبي PS و Xbox اللي يقدروا يجربوا اللعبة بشكل مجاني لحد 2 يناير 2022 ولكن هيحتاجوا لاشتراك “Xbox Live Gold” و “PS Plus” عشان يلعبوها أونلاين.
هل تعلم إن شركة “EA” كانت بتحضر للعبة “Harry Potter” واتلغت؟ للأسف ده اللي صرحت بيه “كيم سالزر” مديرة تسويق منتجات سابقة في الشركة، لما اتسألت خلال حديثها مع موقع “Original Gamer Life” عن المشاريع الملغاة في شركة “EA” قالت إنه كان في مشروع لعبة عالم مفتوح ضخمة لهاري بوتر وإن اللعبة دخلت مرحلة التطوير وكان ليها نسخة تجريبية ولكنها ماقالتش إيه الأسباب اللي خلت المشروع ده يتلغي للأسف!
الممثل البريطاني “Henry Cavill” معروف إنه جيمر من العيار التقيل، خلال إحدى اللقاءات أثناء ترويجه للجزء الجديد من مسلسل “The Witcher” ، اتسأل عن إيه اللعبة اللي حابب يعملها كفيلم أو مسلسل، قال إنه بدء مؤخرا يلعب “Red Dead Redemption 2″، وعلى الرغم من إنه اتأخر في لعبها ولكن مستمتع بيها.. تفتكروا “هنري كافيل” هيكون مناسب للعب شخصية زي أرثر مرجان؟
وإحنا بنودع سنة 2021، كانت لعبة “eFootball” صدمة كبيرة بالنسبة للناس اللي كانوا مستنينها بسبب الأخطاء الكتير اللي ظهرت فيها، ولكن مش بس كده، اللعبة أخدت أسوأ تقييم على موقع “Metacritic” واللي متخصص في مراجعة الأفلام والمسلسلات والألعاب.. واحتلت المرتبة الأولى ضمن أسوأ 10 ألعاب خلال العام الحالي، تقدروا تشوفوا القائمة كاملة من خلال اللينك ده.
من كام يوم، الحساب الرسمي للعبة “Assassin’s Creed” أعلن إن شركة “Ubisoft” بتخطط إنها تضيف تحديث للعبة ” Assassin’s Creed Origins” علشان تقدر تشتغل 60 إطار في الثانية، واللي بنسبة كبيرة هيكون متاح للجيل الجديد من المنصات المنزلية.
We are also looking into adding 60FPS support for Assassin’s Creed Origins, so stay tuned! 👀
— Assassin’s Creed (@assassinscreed) December 21, 2021
