في يومه.. فوائد ماتعرفهاش عن الفشار

بما إن النهاردة يوم الفشار، خطر في بالنا نتسأل عن فوائد الفشار وموقع webmd الطبي قسم الفوائد لأكتر من جزء زي:

– تقليل خطر الإصابة بمرض السكري

الفشار بيساعد في الحفاظ على مستويات السكر في الدم وحتى الأشخاص المصابين بمرض السكر من النوع الأول والتاني على تحسين مستويات الجلوكوز والدهون ليهم.

الموقع كمان بيقول إن الفشار بيساعد على تقليل مخاطر الإصابة بمرض السكر من النوع التاني للرجال والسيدات في منتصف العمر.

– تقليل خطر الإصابة بأمراض القلب

الفشار فيه نسبة عالية من الألياف وتناول كميات كبيرة من الألياف بتساعد على تقليل خطر الإصابة بأمراض القلب والأوعية الدموية وأمراض القلب التاجية، ومن المهم تناول الألياف ضمن النظام الغذائي وزي ما قولنا ده موجود في الفشار

– تقليل مخاطر ارتفاع ضغط الدم

الفشار من غير ملح كتير ممكن يساعد برضه على خفض ضغط الدم وتقليل خطر الاصابة به.

– المساعدة على إنقاص الوزن

الفشار وجبة خفيفة وفيها زي ما قولنا نسبة عالية من الألياف، ده هيساعد الناس على الشعور بالشبع أكتر لإنها وجبة خفيفة وصحية.

كل الفوائد اللي فاتت دي كوم، ومكونات الفشار دي كوم تاني خالص زي:

حمض الفوليك

النياسين

الريبوفلافين

الثيامين

حمض البانتوثنيك

فيتامين ب 6

فيتامين أ

فيتامين هـ

فيتامين ك

موقع webmd بيحذر إن الفوائد دي ممكن الشخص مايستفدش بيها لو أضاف للفشار زبدة أو ملح كتير، وإن الفشار العادي بإضافات بسيطة جدا هيكون صحي أكتر.