دليلك عشان تعرف الشخص اللي بيتوتر بسهولة 

في ردود أفعال كتير بتحصل في حياتنا اليومية لجسمنا ممكن نشوفها بشكل عادي وطبيعي لكن هي في الحقيقة بتكون عبارة عن رد فعل للقلق أو التوتر اللي بنبقى حاسين بيه في الموقف ده.. فا تعالوا نشوف شوية من ردود الأفعال دي: 

1- الضحك

حسب موقع Healthline أوقات كتير بتعدي علينا مواقف أو أحداث سلبية والشعور الطبيعي أو رد الفعل العادي هو إنك تزعل شوية أو تتأثر بس في حالات أو أشخاص معينة بيكون رد فعلهم مجرد “ضحك”.. يُقال إن ده رد فعل من الجسم عشان ينظم المشاعر ويتعامل معاها وساعات بيكون رد فعل من الجسم عشان يدافع عن شعورك بعدم الارتياح.

2- الصداع

حسب Clevelandclinic طبعاً دي الحاجة الوحيدة اللي بتتمسك بينا في الحياة بس هي الصداع.. وهي الحاجة اللي بتحصل لأغلبنا كل يوم والعرض الرئيس بتاعه هو ألم في راسك أو في وشك.. في أنواع كتير للصداع ولكن في الحالة اللي بنتكلم فيها هو الصداع “مش من العظمة لأ” من كتر التوتر.. وده بيكون شبه إن حاجة مربوطة حوالين دماغك وبتحس بألم خفيف أو متوسط في مقدمة وأعلى وجانبي الرأس.

3- الأرق

الأرق له كذا سبب.. في ناس فاكرة إنها مش عارفه تظبط نومها أو مش عارفه تنام لمدة أيام أو أسابيع وساعتها.. بس غالباً أحد الأسباب الأرق ده هو إنك تكون تحت ضغط أو قلق لفترة معينة وده بيخليك ماتقدرش تنام كويس أو بتنام وقت قليل.

4- الشد العضلي

ماتستغربش أه ممكن يجيلك شد عضلي لو إنت حسيت بتوتر.. ساعتها بيظهرلك كتل عضلية صغيرة كده في الجزء اللي فيه شد ومن أكتر المناطق اللي بيحصل فيها شد بسبب التوتر هي الرقبة

5- العرق

حسب موقع Healthline بشكل عام العرق وظيفة بيعملها الجسم عشان يحافظ على تنظيم درجة الحرارة بتاع الجسم.. لو حصل بشكل زايد أو قليل فا دي بتكون مشكلة ولكن في مشاعر معينة لما تحس بيها بتخليك تعرق بشكل كبير  وهي التوتر والقلق.

6- ألم البطن

الجهاز العصبي المعوي اللي بيسموه الدماغ التانية عشان بينبهنا لما يكون في مشكلة بتحصل.. فا لما تكون متوتر بيكون في  استجابة للتوتر زي ألم البطن والغيثان وشعور غريب في البطن.

في النهاية في حاجات كتير بتدل على القلق والتوتر وممكن تبان تصرفات عادية بنعملها في يومنا ولكن غالباً هي بتكون قلق وتوتر.. زي هز الرجلين إنك تاكل في ضوافرك وكمان تاكل شفايفك وحاجات تانية كتير..