سلسلة حكايات يومية عادية حكاية 4: كوباية شاي بلبن

كنت قاعدة بسمع أم كلثوم في قعدة رايقة وهي بتغني أغنية “ألف ليلة وليلة” وجت عند كوبليه “الليل وسماه ونجومه وقمره..قمره وسهره..وإنت وأنا يا حبيبي أنا يا حياتي أنا” وخدت بوق من كوباية الشاي بلبن اللي في أيدي.. وبصيت للكوباية وضحكت
يمكن عشان الشاي بلبن فكرني إن هو أكتر حاجة مرت معايا بأحداث كتيرة من وأنا صغيرة.. من أول ما كان بيفضل شوية صغيرين في الكوباية وأقعد أمثل إني سكرانة لحد مابشربه دلوقتي وأنا كبيرة كمشروبي المفضل على الرغم إن في ناس بتستغربني ومش بيحبوه.. بس في ناس بيقولوا إن الشاي بلبن مشروب الناس الطيبة.. بس أنا عملتله نظرية في دماغي بتقول إن الشاي بلبن هو مشروب الحب أصلا!..
افتكرت وأنا صغيرة ورايحة المدرسة الصبح ماما وهي بتعملي الشاي بلبن
وده بالنسبالي كان أكتر حاجة طعمها حب في الدنيا ولحد دلوقتي
مابعرفش اعمل زيه مهما حاولت.. الشاي بلبن بيمثلي لحظات الدفا

وفي الشتاء لما ببقى متلجة وبتكتك وأعملي كوباية شاي بلبن وأتدفا ولا كأن في حاجة طيب هو فيه حب أحلى من كده!.. افتكرت كمان إنه مش بس بيمثلي الحب  ساعات كمان كان بيمثلي جزء من البدايات الجديدة اللي بخاف منها
فاكرة أول إمتحان ثانوية عامة لما كنت مرعوبة وسهرانة أذاكر وكنت بدور على أي حاجة تفوقني وعملت ساعتها كوباية شاي بلبن وحليت كويس ومن وقتها بقيت أتفائل بيه وكل مرة أعمل كوباية شاي بلبن كبيرة أشربها لحد اللجنة وبقيت عادة عندي لازم كل يوم أشربه أول ما أصحى وقبل ما أنام.. جايز عشان فعًلا مربوط معايا بذكريات حلوة زي أول عيد ميلاد روحته لواحدة صاحبتي وأنا صغيرة ومامتها قالتلنا أنا عاملالكوا “حفل تعارف” عشان أول مرة تيجوا عندنا وعملتلنا كلنا شاي بلبن وكيك
وأفتكرت كمان صاحبتي اللي قابلتها في الجامعة وكانت من محافظة تانية كانت دايمًا بتيجي بدري أوي عن وقت المحاضرات ومابتلحقش تفطر وكنت لما أوصل بلاقيها بتسقي بسكويت في الشاي بلبن كأنه الحاجة اللي بتنقذها هي كمان من الزهق وملل الطريق اللي سافرته وبقيت عادتنا قبل المحاضرات إننا لازم كل مرة نقعد القعدة دي ونرغي ساعات ونراجع ساعات تانية وكنت بعتبرها من أحلى لحظات اليوم.. وافتكرت كمان لما كنت رايحة أول إنترفيو شغل وهموت من القلق وجاوبت على طول أول ما سألوني تشربي إيه.. شاي بلبن.. وكأنه المشروب السحري اللي هيحل كل مشاكلي.. قعدت أفكر إن كل الناس دول كانوا طيبين من أول ماما لصحابي اللي عدوا عليا.. يا ترى عشان كده هو مشروب الناس الطيبة فعلًا زي مابيقولوا؟
ولا يمكن هو بس مربوط معايا بشوية ذكريات حلوة ومحطات في حياتي
لما أشربه بيخليني أفتكرها وأكون ممتنة ليها واحس بالحب.. بس عامة مش فارقة.. أنا بحبه كده كده أيًا كان السبب إيه.