هي الدماغ فيها “صرف صحي” وقت النوم ويا ترى بيشتغل إزاي؟
كلنا عارفين إن النوم حاجة مهمة وحلوة وبنحبها جدا عشان هو مش مجرد وقت بتريح فيه جسمك بس لكن كمان وقت مهم للدماغ عشان ترتب نفسها وتجدد نشاطها.. كتير بتنام مرهق وتعبان وتصحى تلاقي نفسك زي الفل وعندك طاقة كمان.. بس ده بيحصل إزاي؟
حسب موقع Nature وموقع Smithsonianmag وموقع Sciencealert
دراسة عن دماغ الفئران والنوم
قبل ما ندخل في الموضوع نمهد الأول للدارسة اللي اتعملت على الفئران من أكتر من 10 سنين وكانت نتيجتها الوصول لنفس الحاجات في الإنسان.. الدراسة كانت في العقد اللي فات وتم فيها اكتشاف جهاز اسمه “الجليمفاوي” وده كان من خلال استخدام أصباغ بتتحقن في دماغ الفئران والعلماء عرفوا من التصوير والرنين المغناطيسي وظهر فيها إن الجهاز ده بينشط أكتر وقت النوم أو التخدير وإنه بيعمل على إزالة النفايات وطبعًا بيعتمد على النوم “وقته ووضعيته” وحتى إيقاع الساعة البيولوجية سليم ولا بيبوظ كل فترة
التشابه مع الإنسان في دراسة جديدة
فيه تشابه كبير في الجزء ده بين الإنسان والفئران.. دراسة جديدة بتقول إن النظام ده اسمه “شبكة الصرف الصحي” في الدماغ وده اللي ساعد مؤخرا في أبحاث جديدة اتعملت على الإنسان عشان ترسم خريطة للشبكة الموجودة في الإنسان زي ما حصل بالظبط في الفئران.. فتعالوا نعرف ببساطة كده إيه هو النظام ده وفايدته إيه؟
الجهاز وتسميته “بالصرف الصحي”
الدراسة اتعملت في جامعة كوبنهاجن وبتقول إن وأنت نايم دماغك بتعمل على تنضيف السموم وطرد النفايات العصبية اللي بتتراكم طول اليوم من قرف وتفكير وسحلة من أول ما تصحى لحد ما تيجي تنام تاني وكمان الجهاز ده “الصرف الصحي للدماغ” بيضخ سائل نخاعي عشان يشيل البروتينات الضارة زي “بيتا أميلويد” واللي مرتبطة بأمراض وحشة زي الزهايمر
فايدته
دماغك وأنت نايم بتبدأ تظبط توازن الخلايا العصبية وده بيحافظ على الصحة العقلية بدل ما تتجنن.. وبرضه بيقلل من التوتر ويظبط الدوبامين والسيروتونين عشان تصحى فايق ورايق ومركز عكس ما كنت نايم مرهق وتعبان
وده يوصلنا لتفسير مهم إن الأبحاث بتأكد إن “الجهاز الجليمفاوي” بيعطل لو أنت ما نمتش كويس أو ما نمتش أصلا.. وده لأنك كده بتراكم السموم في دماغك وبيأثر على صحة الدماغ على المدى البعيد
في النهاية بعد ما عرفنا أهمية الجهاز ده يوصلنا لأهمية النوم وإنك تكون عامل نظام له ومظبط مواعيده كويس.. وده سبب مهم يخليك لما تكون سهران ومستخسر تنام عشان عايز تعمل أي حاجة إنك ما تعملش كده وتنام وترتاح عشان تصحى فايق ومركز ودماغك رايقة
