إيه هي الدهون الصحية والمصادر اللي ممكن تاخدها منها؟

معظمنا عندنا تصور عن الدهون إنها حاجة وحشة وبتضرنا بس.. لكن اللي ممكن مانكونش كلنا عارفينه هو إن الدهون ساعات بتبقى طيبة وبتفيدنا وليها أهمية.. فيلا بينا ناخد جولة كده في الدهون الصحية والمصادر اللي ممكن ناخدها منها

حسب British Heart Foundation و  Healthline و Mayoclinic

إيه هي الدهون الصحية أصلا؟

نوع من أنواع الدهون اللي مفيدة للجسم وبيحتاجها وده لأنها بتساعد في وظائف حيوية للجسم زي تحسين صحة القلب وعمل المخ.. وبتساعد كمان في امتصاص الفيتامينات زي فيتنامين “A,D,E,K”

ومن أنواعها:

1- الدهون غير المشبعة

• ودي بتكون موجودة في حاجات زي اللحوم ومشتقات الحليب.. وغالبًا بيكون نص الدهون في الأكل دي مشبعة ونصها غير مشبعة
• وموجودة بشكلين “أوميجا 3” زي أسماك السلمون والأنشوجة والماكريل والرنجة والسردين والتونة 
• والنوع التاني “أوميجا 6” وده في الزيوت “الذرة وبذرة القطن والفول السوداني والصويا وعباد الشمس”
• كمان موجودة في نباتات وزيوت نباتية زي “زيوت الزيتون والفسدق وبذور الكانولا وعباد الشمس.. والأفوكادو وبذور اليقطين والسمسم واللوز والكاجو وزبدة الفسدق”

وفايدتها هي إنها بتقلل مستوى الكوليسترول المضر وبتزود نسبة الكوليسترول المفيد.. كمان بتقلل الدهون الثلاثية في الدم ودي ارتفاعها في الدم بيزود احتمال الإصابة بأمراض القلب والأوعية الدموية

2- الدهون المشبعة “بكميات معتدلة”

حسب منظمة القلب البريطانية ومنظمة الغذاء الأمريكية لازم نسبة الدهون المشبعة تكون أقل من 10% من نسبة السعرات الحرارية اليومية وتكون حوالي تقريبا “5-6%” يعني حوالي 30 جرام من الدهون المشبعة يوميًا “للرجالة” أما النساء حوالي 20 جرام من الدهون المشبعة يوميًا.. والأطفال نسبة أقل منهم الاتنين

ودي موجودة تقريبًا في أغلب أكلنا اليومي زي:

– المخبوزات 

– والحاجات الملقلية 

– واللحوم والفراخ 

– ومشتقات الحليب مش الحليب نفسه

وعشان الدهون دي بتأدي لرفع الكوليسترول في الدم يُفضل إنها تتاخد بكميات مناسبة زي ما قولنا فوق كده بالظبط عشان ما تضرناش

في النهاية أكيد مهم تظبيط نسبة الدهون ويفضل أكتر تناول الصحية منها.. وإنك يكون عندك نظام عذائي كويس شامل كل النسب المطلوبة واللي بتحتاجها سواء من البروتنيات أو النشويات أو الدهون وغيرهم من العناصر المفيدة