إيه هي أسباب زيادة الوزن في الشتاء وإزاي نحاول نتجنبها؟

مع دخول الشتاء وزيادة شغف الأكل بشكل كبير، تعالوا نعرف مع بعض إيه هي أسباب زيادة الوزن في فصل الشتاء؟

في مقالة على سكاي نيوز.. بيقول خبير التغذية “هاني جبران” إن الشتاء بييجي ويكون معاه طاقة أكل رهيبة.. حاجة كده زي ما السقا قال: “المصيبة إنه بياكل وخلاص حتى لو مش جعان.. يعني عنده سُعار”.

بس في ناس تانية بقى بيكون عندها “اكتئاب موسمي” ودول بقى بيحاولوا يتغلبوا على الموضوع ده بإنهم بياكلوا.. بياكلوا كتير وده طبعاً هيزود وزنهم بشكل كبير لو هم مش من النوع اللي عنده سرعة حرق.. واخد بالك إنت

لكن من العوامل المهمة أكتر في زيادة الوزن هو “قلة الحركة”.. كتير مننا مابيقدرش يعمل أي نشاط في الشتاء وبتقل حركته بشكل عام وبالتالي أكل مع قلة حرق يعني زيادة الوزن..
وكمان أغلبنا بيكسل يستمر في ممارسة الرياضة زي نزول الجيم أو أي نشاط رياضي تاني متعود عليه والحالة بتبقى “ماما أنا تعبت”

ولعشاق السحلب.. بيقول خبير التغذية إن فيه مشروبات بنشربها كتير في الشتاء عشان ندفي نفسنا واللي منها السحلب بيكون فيه نشاء وحليب ومكسرات ودول بيساعدوا على زيادة الوزن.. فا ممكن تستبدلها بمشاريب دافية تانية زي القرفة والزنجبيل هتدفيك وسعراتها الحرارية قليلة وبنت ناس ومتربية

وفيه إخواتنا الغلابة بقى اللي ولا بيتخنوا صيف ولا شتاء دول ربنا يكون في عونهم.. بتبقى حالتهم ” يارب مشاكل من دي”

بعد ما عرفنا الأسباب.. يلا نعرف إيه الحاجات اللي ممكن نعملها عشان نحافظ على وزننا في الشتاء من الزيادة:

1- الشمس:

محتاجين نتعرض لأشعة الشمس وخصوصاً في فترة الصبح عشان بتساهم في تقليل “هرمون الكورتيزول” وده الهرمون المسؤول في فتح الشهية وهو دي المساعدة اللي بتقدمها الشمس عشان تساعدك تخفف وزنك

2- التمارين:

عشان في ناس بتكسل تنزل الجيم بشكل عام فا أكيد بيكسلوا ينزلوا لما يكون الجو برد كمان فلازم تحاول تماس أي رياضة والاقتراح هو “التمارين المنزلية” في البيت زي الكارديو واليوجا والزومبا وتحاول تحافظ على لياقتك حتى والجو برد

3- الغذاء الصحي

كالعادة النصيحة المهمة جداً هي تنظيم أكلك وإنك تحاول تخليه عبارة عن خضروات وفواكه بحيث تظبط نظامك الغذائي وطبعاً في حالات معينة بتحتاج تستشير دكتور عشان يكون ليك نظام غذائي حسب الهدف اللي بتسعى تحققه