اعرف إيه هو أصل أغنية “وحوي يا وحوي”
![](https://theglocal.com/wp-content/uploads/2024/03/Website-Thumb-6.png)
من زمان واحنا بنسمع أغنية “وحوي يا وحوي” ومربوطة في دماغنا برمضان وتعتبر الأغنية الرسمية ليه.. وأجوائها مليانة فرحة وسعادة بالشهر الكريم ومجرد ما بنسمعها بنحس إننا في رمضان خلاص وبنحن لكل ذكرياته.. بس عمرك سألت نفسك يعني إيه أصلا وحوي يا وحوي؟..
عشان كده في الموضوع ده هنقولك أصل كلمة “وحوي يا وحوي” وفقا لموقع العربية وموقع سكاي نيوز والجزيرة الوئائقية
أغنية ” وحوي يا وحوي” من كتابة الشاعر محمد حلمي المانسترلي وغناء المطرب أحمد عبدالقادر واتعملت سنة 1937م.. والباحثين بيقولوا إن عمر الأغنية أقدم من شهر رمضان نفسه!..
لإنها يترجع لعصر الفراعنة ومفرادتها بتقول “وحوي يا وحوي إيوحا” مشتقة من “واح وي إيوح” ومعناها تعددت حكاياته..
الباحثة وهيبة صالح بتقول إن الأطفال الفراعنة زمانكانوا بيغنوها للقمر لما كان بيحصله خسوف لأنهم كان بيعتقدوا إن ده بسبب سفر ألهته إيزيس خارج البلاد فكانوا بيقولوله “واح وي إياح” يعني اظهرلي واستمر في السطوع يا قمر وفضلت مستمرة طول التاريخ من بعدها.
والبعض بيقول إنها جملة كان بيستخدمها الفراعنة للترحيب بملكتهم “إياح حتب” أو زي ماكانوا بيطلقوا عليها “قمر الزمان” وهي والدة الملك أحمس الأول اللي عاشت في نهايات الأسرة الـ 17 وكانت ليها مكانة كبيرة بسبب تضحيتها للوطن وتشجيع ابنها أحمس إنه يحارب الهكسوس ويهزمهم..والمصريون القدماء كانوا بيخرجوا لاستقبالها بالمشاعل والمصابيح وهم بيغنولها واح وي إيوح” تقديرا لدورها العظيم.
وفي قصص تانية يقال إن: “وحوي يا وحوي” معناها ذهب أو رحل وبتتقال عن وداع شعبان واستقبال رمضان يعني وحوي يا وحوي= رحل شعبان وجاء رمضان
وبعض المؤرخين قالوا إن كلمة “أيوح” معناها القمر أو الهلال ويقال إن الأغنية كانت زمان تحية للقمر و من العصر الفاطمي بقت تحية خاصة بهلال رمضان..
وبعد ما عرفت معناها إيه.. اسمع الأغنية من هنا واستمتع بالأجواء الرمضانية
بس المرة دي وأنت حاسس بالتراث ومعنى الكلمات اللي بقاله ألاف السنين ولسه مكمل معانا.