القصة الكاملة لفوز محمد الزيات بفضية التايكوندو في بارالمبياد طوكيو بعد إصابته

النهاردة الخميس 2 سبتمبر لاعب المنتخب المصري للتايكوندو البارالمبي “محمد الزيات” فاز بالميدالية الفضية وده بعد تأهله لدور النهائي من ضمن منافسات وزن 61 كيلو في دورة الألعاب البارالمبية طوكيو 2020، وفاز كمان بالميدالية الفضية بدون ما يدخل ماتش النهائي.

وده حصل بعد ما فاز على اللاعب الروسي “دانييل سيدوروف” اللي كان كسبان في بداية الماتش ولكن النتيجة اتغيرت تمامًا بعد ما ضرب اللاعب الروسي محمد الزيات ضربه خطر في وشه وبكده تم استبعاد اللاعب الروسي وفاز محمد الزيات في ماتش نص النهائي وتأهل لدور النهائي.

وللأسف غادر محمد الزيات الماتش على نقالة بسبب قوة الإصابة اللي اتعرض لها، وكانوا في انتظار قرار من دكتور البطولة عشان يحدد هل هيقدر يشارك في المباراة النهائية وينافس على الميدالية الذهبية ولا هيكتفي بس بالميدالية الفضية ومش هيقدر يخوض المباراة النهائية بسبب إصابته، ولكن الدكتور قرر إنه محمد الزيات مش هيقدر يشارك في المباراة النهائية وهيكتفي بالميدالية الفضية.

 وبالفعل كده أحرز محمد الزيات الميدالية  السابعة لمصر في بارالمبياد طوكيو 2020 .

وكانت نتيجة ماتش نصف النهائي قبل إصابة البطل المصري 24-8 للاعب الروسي وده قبل ما يصيب محمد الزيات ويتم استبعاده.. وكان محمد الزيات ضمن لمصر ميدالية في المشاركة الأولى للتايكوندو المصري في دورة الألعاب البارالمبية.

أما “دانييل سيدوروف” البطل الروسي هيلعب كده على الميدالية البرونزية.

والجدير بالذكر إن محمد الزيات تأهل لدور نصف النهائي بعد ما فاز على البطل الفرنسي “بوفا كونج” بنتيجة 22-10 وعشان كده اتأهل لدور نصف النهائي.

خلينا كمان نفكرك إن البعثة المصرية في بارالمبياد طوكيو لحد دلوقتي قدرت تحصد 7ميداليات مختلفة، منهم 4 ميداليات فضية، وبرونزيتين، وكلهم في منافسات رفع الأثقال. ودي مشاركة للمرة الـ 13 في دورة الألعاب البارالمبية في تاريخها.

Back to top button