ليه لسه بندور على الحب.. رغم فشل علاقات كتير حوالينا

الفترة الأخيرة بنلاقي علاقات كتير بتفشل حوالينا رغم إنها بتبقى قصص حب كبيرة ومستمرة بقالها مدة طويلة وده بيخلينا نستغرب ونبدأ نخاف شوية من العلاقات لكن العجيب إن ده بيخلينا برضو نفضل ندور على الحب وعايزين نلاقي نصنا التاني مهما حصل.. وبنشوف الناس على السوشيال ميديا مع كل حالة انفصال بيقولوا “ولسه عايزين تتجوزوا” وعشان الموضوع المحير بالنسبة للناس ده تعالى نقولك ليه كلنا بنفضل ندور على الحب وفقا لموقع
“success consciousness”

1- عشان نفسنا نحب ونتحب
بطبيعتنا كبشر كلنا نفسنا نحب ونحس بالأمان بغض النظر عن سننا أو جنسنا أو شكل حياتنا..  غريزتنا بتخلينا نفسنا نحس إننا بننتمي لشخص تاني وفاهمنا وفاهمينه ومن الأخر نقدر نقول عليه ال soulmate بتاعنا
فالبحث عن الحب هيفضل رغبة عندنا لأخر الحياة.

2- عشان نفسنا نحس بإن عندنا حد قريب مننا وصاحبنا
الحب بيخلينا نحس بالألفة وإن عندنا حد نرغي معاه ونحكيله مصايبنا والمواقف التافهة اللي بنمر بيها ونتكلم بعد يوم صعب وطويل أو نخرج فنحس إن الدنيا حلوة معاه عشان كده بنحتاج حد في حياتنا.

3- عشان نفسنا نحس بالأمان
الحب بيخلينا نحس بالأمان وإن عندنا حد نسند عليه مهما الدنيا باظت حوالينا
وده بنحس بيه بشكل كبير في العلاقات الصحية اللي فعلا بنكون مطمنين فيها عشان كده بنسعى إننا نلاقي الحب عشان يعوضنا عن الشعور بالخوف والقلق اللي بنحس بيه.

4- عشان نفسنا نحس بالتشجيع والتطور
لما بيكون في حياتنا حد بيحبنا بجد ده بيشجعنا نتطور في شخصيتنا ونحاول نبقى ناس أحسن في الحياة بنحس إن في حد موجود عشانا وبيشجعنا في الحاجات اللي بنحلم بيها و في هواياتنا ويشجعنا نخرج بره الكومفورت زون بتاعتنا.

5- عشان نفسنا نحس بالقبول والتقدير
لما بيكون في علاقة في حياتنا ده بيخلينا نحس بالقبول والراحة وإن في حد شايفنا وقابلنا بعيوبنا قبل مميزاتنا ودي حاجة مهمة عند البشر إنهم يحسوها خاصة إن الناس اللي مرت في حياتها بصعوبات أو حياة مليانة عدم تقبل خلتهم يشوفوا نفسهم بشكل أقل ومستنيين الشخص اللي يحبهم هو اللي يعكس محبته في عيونهم فيثقوا في نفسهم من تاني ويقدروها!

6- عشان نفسنا ننجح عشان نشارك ده مع شخص بنحبه
معظمنا بيبقى نفسه ينجح ويوصل لمكانة كبيرة في حياته أو في شغله أو حتى يطور في شخصيته وجزء من ده بيكون عشان يلاقي الحب ويقدر يبهر الشخص اللي بيحبه بنجاحه ويشاركه فيحس إن معاه شخص بيدعمه وإنه فعلا عمل حاجة.

الحب مهم في حياتنا ويقدر يخلينا أشخاص أحسن وأنضج بس ده لو العلاقة كانت صح من الأول ولو فعلا واعيين بيها مش مجرد علاقة وخلاص عشان مانبقاش لوحدنا أو خايفين من بكرة عشان كده لازم نختار صح عشان العلاقة تفضل وتستمر و مهما ناس حوالينا اختارت غلط نركز احنا في اختيارنا..وعلى رأي الست أم كلثوم “العيب فيكم يا في حبايبكم أما الحب يا روحي عليه”..