بناء على تجارب حقيقية.. 9 علامات هتقولك إن صاحبك ده صاحب العمر!
كتب: مرام أبو النجا
الصاحب ساحب، وصاحبك مرايتك ومقولات كتير أوي طول عمرنا بنسمعها عن الصحاب، وأغاني وأفلام شوفناها وسمعناها من صغرنا أكدت لنا أهمية الصداقة في حياة أي شخص وقد إيه هي ممكن تبقى سبب أساسي في سعادة ونجاح ناس كتير، وعشان كده حبينا نقولك بناء على تجارب حقيقية وشخصية شوية علامات كده لو موجودين في صاحبك/ صاحبتك يبقى مبروك عليكوا ويا بختكوا إنتوا من المحظوظين
1- لو حصلك أو حصله تغيير علاقتكوا مش بتتأثر:
يعني هو معاك على أي حال أنت فيه، حزين ولا سعيد.. قريب ولا بعيد زي ما الأستاذ بهاء سلطان كان قايلنا، مش لما تبقى متضايق شوية أو الدنيا جاية عليك تلاقيه اتبخر وبعدين يظهر أول ما الدنيا تبقى حلوة معاك، والعكس لو حاله هو اللي اتغير
ده مايأثرش على علاقتكوا بأي شكل، يعني لو ارتبط أو حصل أي تجديد في حياته
فده مايخليهوش يستغنى عن علاقتكوا أو يستبدلها بالتجديد ده، من الآخر علاقتكوا دي تبقى مستمرة وماشية عالحلوة وعالمرة
2- صديقُك من صدَقَك لا من صدَّقك:
ودي مقولة للإمام علي بن أبي طالب ومعناها إن صديقك هو اللي يقولك الصدق حتى لو كلامه مش هيعجبك، ويوجهك أو يلفت نظرك لو غلطت أو شايفك بتأذي نفسك بأي طريقة، مش اللي هيصدقك ويوافقك على أي حاجة تعملها وخلاص حتى لو ليها ضرر واضح عليك، وزي ما عارفين بالبلدي إن يا بخت من بكاني وبكى عليا ولا ضحكني وضحك الناس عليا
3- يشجعك ويدعمك حتى لو الحاجة مش على مزاجه:
ودي مرتبطة شوية بالنقطة اللي قبلها، وهي إننا ممكن نحب حاجات مختلفة عن أصحابنا ومش شرط أبدَا نبقى نسختين بالكربون في كل شيء عشان أصحاب،
بس شرط نبقى بندعم بعض وكل واحد يشجع التاني على الحاجة اللي هو بيحبها ومتميز فيها حتى لو هو مش بيشاركه نفس الحب أو الإهتمام ده
4- لما تتخاصموا ما يفجرش:
في حديث عن النبي صلى الله عليه وسلم قال فيه” أربع من كن فيه كان منافقاً خالصاً، ومن كانت فيه خصلة منهن كانت فيه خصلة من النفاق حتى يدعها، إذا اؤتمن خان، وإذا حدث كذب، وإذا عاهد غدر، وإذا خاصم فجر”
والفجر هنا ليه أشكال كتير، بمعنى إنه لو اتخانقتوا مايفضحش سرك اللي مأمنه عليه، أو مايقررش يأذيك أذى عن قصد ويراعي أصول الصداقة والعشرة اللي بينكوا، لأن اللي يفجر في الخصومة ممكن يبيعك ويغدر بيك في أي وقت
5- يرد غيبتك:
يعني لو سمع حد بيتكلم عنك يرد سواء في خير أو في شر، لو خير يأمن ويأكد عليه، ولو شر لو يقدر يوضح ويصلح ويحسن صورتك لو كنت أنت الغلطان، أو إنه يوقف الشخص اللي بيتكلم عليك عند حده لو هو اللي غلطان، بس اللي يسمع ويسكت أو يسمع ويضحك أو يشارك في الكلام عليك ده تعلم عليه لأن عمره ما يبقى صاحب حقيقي
6- علاقته بأهلك أو بأي حد من طرفك :
اللي بيحب حد بيحب أي حاجة منه، وفي الصداقات الحقيقية أهل أصحابنا بيبقوا زي أهلنا لأن صديقك ده نفسه بيبقى فرد من “الأسرة” اللي أنت بتختارها في حياتك،
فحب وإحترام صاحبك لأهلك وثقة أهلك فيه ده دليل على إن صاحبك ده تمام،
وكلنا أكيد عدى علينا الصاحب اللي أهلك مش بيرتاحوله أو بيحذروك منه وبتكتشف مع الوقت إن معاهم حق
7- مش بيقارنك بحد:
اللي يحطك طول الوقت في مقارنات مع ناس تانية أو يحط صداقتكوا في مقارنة مع ناس تانيين، ويقولك نفسي تبقى زي فلان أو تعملي زي ما علان بيعمل مع صحابه ده كده “ريد فلاج” زي ما بيتقال، عشان صديقك بييبقى متقبلك زي ما أنت، وحابب ومقدر كل اللي بتقدمه في الصداقة ومش عايزك تبقى شبه حد تاني ولا إن صداقتكوا تبقى شبه أي مثال موجود لناس يعرفهم أو حتى ناس شافهم على السوشيال ميديا
8- ماتخافش تحكيله حاجة:
لو حصلك أي موقف وحسيت للحظة إنك متردد تحكيه لصاحبك عشان مايغيرش فكرته عنك أو نظرته فيك أو يحكم عليك من خلال الموقف ده يبقى كده لف وإرجع تاني، الصداقة دي مش تمام، لأن الصاحب الحقيقي هو اللي ممكن تحكيله أي حاجة كأنك واقف قدام مراية لا تتكسف ولا تداري وتخبي وتبقى على طبيعتك وواثق إن مافيش أي حاجة هتقولها هتأثر على علاقتكوا
9- يتمنالك الخير:
ناس كتير هتشوف إن دي حاجة بديهية جدًا ما هو صاحبي أكيد يعني هيتمنالي الخير، بس الحقيقة إن كل بني آدم عنده حتة ضلمة جواه يمكن ماتظهرش غير لو حصلت مواقف معينة حفزت عنده مشاعر زي الغيرة أو الحقد ودي طبيعة بشرية مانقدرش نغيرها لكن نقدر نكتشفها في الشخص اللي قدامنا بدري بدري قبل ما نقرب منه زيادة، وهتقدر بقى تعرف ده لما تتحط في موقف الناس بتشكر فيك
في شكلك في أخلاقك في شطارتك في أي حاجة، وهو مثلًا الناس ماشكرتش فيه زيك، في اللحظات دي الشعور الحقيقي بيبان والفرحة الحقيقية بتبان وأي حاجة تانية برضه بتبان.. ونصيحة صدق إحساس
ماحدش بيختار أهله، بس كلنا بنختار صحابنا واللي ساعات بيبقوا في غلاوة وأهمية العيلة، فاختاروا العيلة اللي تحسوا وسطها بالأمان وتبقى السند والدعم ليكوا لما تحتاجوا، وتساعدكوا تكونوا دايمًا أحسن نسخة من نفسكوا.
