9 حاجات تخطط بيهم للسنة بدل ما تبطل السجاير وتشيل حديد بس

مع بداية السنة بنبقى عندنا طاقة لبداية جديدة وإننا نصلح غلطات السنة اللي فاتت والسنين اللي قبلها ونعمل زي ما شعبان عبد الرحيم بيقول من أول يناير هبطل السجاير وأكون إنسان جديد وعشان الطاقة دي ماتروحش على الفاضي من الأفضل طبعا إن يبقى عندك خطة أو تنظيم للحاجات اللي عايز تحققها طول السنة.

وعشان تدخل السنة الجديدة برجلك اليمين هنقولك شوية نصايح تخطط بيها لسنة أحسن ومفيدة في بنود مختلفة في حياتك زي ما قال موقع “luxury columnist” في واحد من مقالاته:

1- قيم علاقاتك:

فكر في أهدافك في العلاقات العاطفية وفي الصداقات كمان، فكر أنت عايز تحقق إيه مع الناس دي في حياتك وإزاي تقدر تحسين العلاقات دي في السنة الجديدة، وشوف هل أنت عايز أصدقاء أكتر السنة دي من السنة اللي فاتت؟ ولا فيه بعض الصداقات اللي عايز تستثمر فيها أكتر وتشوف صحابك دول أكتر وتحافظ عليهم وتتمسك بيهم! ولو أنت سينجل شوف عايز تنزل “ديتس” أكتر وتتعرف على ناس جديدة ولا عايز تفضل سينجل زي ما أنت ولو أنت مرتبط عايز تكمل في العلاقة دي إزاي! وأيا كانت أهدافك دي اكتبها عشان تحققها.

2-  اعمل خطط مادية:

في الأول فكر معاك كام وشوف عايز تعمل إيه بالفلوس دي في السنة الجديدة، وخطط عايز تحوش كام السنة الجديدة واعمل ميزانية والتزم بيها وبلاش شغل الأونلاين شوبينج ده، وده هيساعدك تبقى عارف اللي معاك واللي هيجي كام، وياريت لو تحوش فلوسك دي في حساب في البنك عشان الفلوس تبقى بعيدة عن ايديك.

3- امشي بمبدأ “باريتو”:

مبدأ “باريتو” بيقول إن 80% من النتائج سببها 20% من الأسباب، فخلي الـ 20% من أنشطتك دي هي اللي تيديك الـ 80% من رضاك، فحاول تطبق المبدأ ده على أي عنصر من عناصر حياتك يعني مثلا في الصداقات حاول تقضي 20% من الوقت مع الناس اللي بتخليك مبسوط عشان تطلع بنتيجة فعالة عن الصداقة، وده مش معناه إنك تقطع علاقاتك التانية بس قضي وقت أكتر مع الناس اللي بتخليك مبسوط وشبهك.

4- اعمل قايمة قرارات واقعية للسنة الجديدة:

أكيد صعب جدا تغيير العادات القديمة بعادات جديدة، وبلاش تعمل القايمة دي بالسلبيات اللي بتعملها ومش عايز تكررها لإن قايمة السلبيات دي هتبقى بداية طريق الفشل، فبدل ما تعملها اعمل قايمة بالإيجابيات اللي عايز تحققها زي إنك تشرب كوباية مياة قبل ما تاكل بنص ساعة، فحاول تختار أهداف محددة وقابلة إنها تتحقق واتكلم فيها مع صحابك والناس القريبين منك عشان يساعدوك إنك تنفذها، وكافئ نفسك كمان لما تنفذ أهدافك اللي مخططلها حتى لو إنك تتفرج على فيلم بتحبه.

5- ركز على الأكل الصحي:

اسأل نفسك بتاكل فاكهة وخضار بنسبة كويسة ولا لا، ولو لا فحاول تعمل لنفسك عصاير جديدة وتبدأ بيها يومك وخليه روتين عندك وجرب فواكه وخضروات جديدة مادوقتهاش قبل كده عشان تشع نفسك، يمكن تعجبك، ولو ماقدرتش تقاوم ولسه بتطلب أكل من برا ومش عارف تعمل أكل في البيت جرب المطاعم اللي بتعمل أكل صحي.

6- اعمل خطط عشان لياقتك البدنية:

زي كل سنة وزي كل يناير خلاص هشيل حديد أكيد هتخطط تخس أو تتخن وتظبط جسمك، فبدل ما تدفع اشتراك الجيم سنة أو 6 شهور اقعد الأول مع نفسك واسأل نفسك أنت فعلا بتتبسط لما تروح الجيم ولا هو ممل بالنسبة لك؟، فلو كانت إجابتك لا ففكر مثلا في إنك تروح “سيشينز” زومبا أو فكر في السباحة أو إنك تركب عجل أو تجري، وقسم هدفك ده لخطوات صغيرة قابلة للتحقيق عشان تنجح فيه أحسن فمثلا لو كان حلمك إنك تجري في ماراثون ابدأ الأول بالمشي والجري لمسافات قصيرة قبل ما تبدأ في المسابقات عشان تبني قدرتك إنك تتحمل.

7- اتعلم حاجة جديدة:

خلي السنة الجديدة فرصة عشان تتعلم حاجة جديدة واستفاد من الإنترنت إنه يعلمك ده، سواء كان آلة موسيقية أو لغة أو رياضية جديدة، لإن تجربة شيء جديد هيخليك نشيط طول السنة، وهيكون كمان له فوايد إضافية زي إنك تكون صداقات جديدة أو تزود لياقتك أو إنك تزود مستوى تركيزك.

8- خطط لسفرك السنة دي:

بداية السنة وقت مناسب جدا عشان تخطط هتسافر فين طول السنة، سواء كنت عايز تسافر مرة ولا عايز تسافر مرتين عشان تتأكد هتوفر قد إيه وتحوش قد إيه، خصوصا إنك تقدر تستفاد بعروض كويسة لو حجزت بدري، وظبط إجازاتك عشان الشغل أو الدراسة عشان تقدر تستفاد بأكبر وقت من الإجازة.

9- اكتب أهدافك:

كل يوم بليل حاول تكتب اللي عايز تحققه في اليوم اللي بعده، لإن الكتابة هتساعدك تخلي عقلك يركز، وبلاش تحس بالذنب لو أهدافك مامشيتش بالشكل اللي أنت عايزة بس ادي نفسك مكافأة في كل مرة حققت أهدافك، واكتب أهداف الـ 12 شهر بتوعك.

في النهاية خليك عارف إن نصايح التخطيط للسنة الجديدة هتحقق أسهل لو بدأت فيها من دلوقتي، والسنة الجديدة فعلا وقت حلو عشان تاخد قرارات بس مش الوقت الوحيد اللي تاخد فيه قرارات.

Related Articles

Back to top button