فوايد وأضرار الدش البارد والسخن

فيه تريند منتشر بقاله فترة عن إن الناس “الناجحة” طول الوقت بينصحوا الناس إنهم يستحموا بمياه باردة الصبح.. وناس كتير كل ما تتطلع في بودكاست تتكلم عن فوايد الشاور بمياه باردة.. وفيه كذا فريق من الناس في موضوع الاستحمام.. ناس بتستحمى بمياه باردة في الصيف بس، ومياه سخنة في الشتاء بس.. وناس بتستحمى بمياه باردة أيًا كان الجو.. ونفس الكلام ناس بتستحمى بمياه سخنة في أي وقت.. وناس ملهاش في الخناقة دي أصلا وبيستحموا بمياه “فاترة” بين الاتنين.

 

طب إيه فوايد وأضرار الدش بماية باردة أو سخنة؟ وإيه الأفضل للجسم؟ وإيه أحسن وقت تستحمى فيه بمياه باردة أو سخنة؟ تعالوا نشوف موقع Healthline قال إيه في الموضوع ده.

 

فوايد الاستحمام بمياه باردة:

• بتهدي حكة الجلد

• بتفوقك وتصحصحك: لما المياه الباردة بتخبط جسمك، بيحصله نوع من الصدمة، والصدمة دي بتزود من تدفق الأكسجين، وبتزود من معدل ضربات القلب، وبتزود اليقظة.

• زيادة الدورة الدموية: لما بتستحمى بمياه باردة، ده بيزود دوران الدم في الأنسجة العميقة بمعدلات أسرع عشان الجسم يحافظ على درجة حرارته المثالية.

• تقليل وجع العضلات بعد التمرين وبتساعد على استشفاء العضلة

• أحيانا بيساعد على فقدان الوزن: بعض الخلايا الدهنية بتولد حرارة عن طريق حرق الدهون، وده بيحصل لما بيتعرض الجسم لظروف باردة زي الاستحمام.

• نضارة الشعر والجلد

 

سلبيات الاستحمام بالمياه الباردة:

• الدش بمياه باردة ممكن ماتبقاش فكرة كويسة لو أنت اصلا بردان، لأن ده هيزود من احساسك بالبرد، وهيزود الوقت اللي محتاجه جسمك عشان يدفى.

• ونفس الكلام لو أنت مريض أو عندك برد أو زكام، الاستحمام بمياه باردة ممكن مايكونش أفضل حاجة في الوقت ده.

 

فوايد الاستحمام بمياه سخنة:

• الراحة من أعراض البرد: حرارة المياه والبخار بتساعد على فتح مجرى الهواء وتليين البلغم وتنظيف الممرات الأنفية.

• المساعدة في تنضيف شوائب البشرة: المياه السخنة بتساعد على فتح مسام الجلد، وبالتالي تنضيف الجلد من الزيوت والشوائب.

• المساعدة في استرخاء العضلات 

 

سلبيات الاستحمام بالمياه السخنة:

• المياه السخنة ممكن تؤدي لتهيج البشرة وجفافها

• المياه السخنة ممكن تسبب حكة الجلد والبشرة

• زيادة ضغط الدم: لو أنت بتعاني من ارتفاع ضغط الدم أو أمراض القلب والأوعية الدموية، فالدش بمياه سخنة ممكن يبقى أسوأ بالنسبالك.

 

نصايح الخبراء في موضوع الاستحمام ده أغلبها بسيطة: إنك تستحمى بمياه فاترة، بين الساقعة والسخنة، وأفضل وقت تستحمى فيه بمياه باردة هو الصبح لما تصحى، وأفضل وقت تستحمى فيه بمياه سخنة هو بليل قبل ما تنام. وفي جميع الأحوال، كل شخص حالته بتختلف عن التاني، وتفضيلات كل شخص بتختلف من شخص للتاني.