الدولة توجه بتنفيذ إسكان مفروش عشان الأسر ماتتكلمش في مهر

النهاردة 5 سبتمبر رئيس الجمهورية عبد الفتاح السيسي كان في جولته التفقدية بأكبر قافلة إنسانية لرعاية مليون أسرة على مستوى الجمهورية ومبادرات الحماية المدنية، وأثناء جولته قال إنه هيكون مبسوط لو مبادرة “سكن كريم” بقيت بتشمل منازل مفروشة بالكامل.

وقال كمان للدكتور مصطفى مدبولي رئيس مجلس الوزراء “أنا بفكر إننا نعمل شقق ونفرشها فرش كويس، علشان مش عاوزين الأسر تناقش موضوع المهر، لو يتكلموا في الشبكة ماشي، إنما المهر لأ، ونقوله تعالى في شقق مفروشة بإيجار، وجاهزة ويأجروها بس، ومايدفعش مقدمة كبيرة وأقساط كبيرة وبندرس الموضوع ده بقالنا شهور”.

وأضاف رئيس الجمهورية وقال “الفكرة بتاعة إني أعمل إسكان مفروش والناس تدفع إيجار فيه، ده موضوع مش في ثقافتنا، بس هيخلي الأسر مبتتكلمش لا في مهر أو فرش، ولا يتخانقوا على حاجة، هيدفعوا إيجار وخلاص، وهنبقى شغلنا أهالينا في دمياط”.

الجدير بالذكر إن المبادرة دي بدأت في 2019 وأثناء فعاليات المؤتمر الأول لمبادرة «حياة كريمة»، داخل استاد القاهرة في 15 يوليو 2021 عرض رئيس مجلس الوزراء الدكتور مصطفى مدبولي الإنجازات اللي حققتها المبادرة واللي كان أبرزها مبادرة “سكن كريم” وقال إن المبادرة بتستهدف تأهيل البيوت غير اللائقة للمواطنين، وكمان بتستهدف التوسع الرأسي عشان يتم إتاحة أكبر عدد من الوحدات السكنية.

مبادرة “حياة كريمة” هي مبادرة أطلقتها وزارة التضامن في نوفمبر 2017، وهدفها تحسين الأوضاع الصحية والبيئية، وتطوير منازل الأسر الفقيرة وبالأخص الأسر اللي بيتلقوا معاش “تكافل وكرامة”

وتحسين البنية التحتية لمنازلهم وتركيب وصلات الصرف الصحي ومياه الشرب وكمان إنشاء أسقف وتأهيل المنازل، وده في القرى المحتاجة أكتر في المحافظات المستهدفة.

وبيتم فيها اختيار المنازل على حسب القرى الأكتر فقرًا والقرى اللي فيها شبكات عمومية لمياه الشرب وللصرف الصحي، والمساكن المسجلة في قاعدة بيانات برنامج “تكافل وكرامة” و”الضمان الاجتماعي”  وده طبقًا لخرايط الفقر في “الجهاز المركزي للتعبئة العامة والإحصاء”.

والجهة المنظمة للمبادرة هي وزارة التضامن الاجتماعي عن طريق الاشتراك مع عدد من الجهات الحكومية والمؤسسات الاجتماعية، وتم تنفيذ تدخلات لعدد كبير من الأسر في كذا محافظة منها “المنيا وأسيوط وسوهاج وقنا والأقصر”.

Back to top button