جرائم ترتكب بحق المرأة في السودان

الأسبوع اللي فات انتشرت أخبار عن الجرايم اللي بتحصل في السودان تحديدا في مدينة ود مدني السودانية والانتهاكات اللي مارستها قوات الدعم السريع ضد الأهالي وخاصة النساء والفتيات اللي تم اغتصابهم
وبقوا بيدوروا على حبوب منع الحمل علشان يقدروا يحافظوا على نفسهم لدرجة إن بعضهم بيوصوا قرايبهم يقتلوهم لو حد هجم عليهم علشان مايتعرضوش للاغتصاب

علشان كده في الموضوع ده هنقولك الانتهاكات اللي بتتعرض ليها المرأة السودانية من فترة كبيرة وفقا لموقع alhurra و  alarabiya و aawsat

العنف ضد النساء

وفقا للأمم المتحدة قبل ما تحصل الحرب في السودان وفي أكتر من 3 مليون امرأة وفتاة في السودان عرضة لخطر العنف القائم على النوع الإجتماعي وبعد ما حصلت الحرب وصل عددهم لحوالي 4.2 مليون!
والانتهاكات ضد النساء في السودان مش حاجة جديدة بالعكس من زمان
وبيتم استخدام المرأة في الحروب بطريقة وحشية.



التحرش والاغتصاب

قالت رئيسة مبادرة “لا لقهر النساء” أميرة عثمان حامد أن كتير من النساء السودانيات بيتعرضوا يوميا للتحرش والاغتصاب والاحتجاز القسري والاختطاف في جميع أنحاء السودان حتى القاصرات.
وحسب جريدة الشرق الأوسط بعض الناجيات تم اغتصابهم أمام أزواجهم وأطفالهم وده سبب للبعض صدمة نفسية خاصة بسبب تعرضهم للاغتصاب أكتر من مرة وقالوا في شهاداتهم إن اللي عملوا كده كانوا لابسين زي قوات الدعم السريع.

خطف النساء واسترقاقهم

مش بس كده كمان بيتم استغلال النساء وبيعهم كسبايا في بعض الأسواق والبعض بيتم اختطافه  وطلب فدية مقابل إطلاق سراحهم
وقالت مديرة وحدة مكافحة العنف ضد المرأة والطفل بالسودان “سليمى إسحق” إن تم اختطاف عدد كبير من النساء وعرضهم للبيع أو بيتم اعادتهم لأهلهم مقابل فدية
والبعض تم الاعتداء عليه واسترقاقهم أو أخدهم لمناطق برة السودان ومناطق حدودية لبيعهمم.


وللأسف مفيش أعداد محددة دقيقة لعدد النساء اللي تم تعرضهم للاغتصاب أو بيانات كاملة لأن الأسر بتخاف وبتتكتم على الموضوع خوفا على بناتهم وخوف من الوصم الإجتماعي اللي ممكن يتعرضوا ليه.


ولسه لحد النهاردة نساء السودان بيعانوا من الاغتصاب والتحرش وكل وسائل التهديد ضدهم رغم إن اللي بيحصل يعتبر جريمة حرب وجريمة كمان ضد الإنسانية

Related Articles

Back to top button