في يوم السرطان العالمي.. بنرشحلكوا أفلام حلوة اتكلمت عن السرطان بشكل مختلف

يوم 4 فبراير هو اليوم العالمي لمرض السرطان، واليوم ده بيكون هدفه نشر الوعي عن المرض وعن تحسين الوصول للرعاية والفحص والكشف المبكر والعلاج من السرطان.

وبمناسبة اليوم ده بنرشحلكوا مجموعة من الأفلام المهمة اللي اتكلمت عن السرطان أو ناقشته بطريقة مختلفة وبـ زوايا إنسانية وبشكل يخليك فعلا تحس بمريض السرطان وبيمر بإيه هو وحبايبه اللي حواليه.

Miss You Already 

الفيلم بيحكي قصة اتنين بنات صحاب عمر، وأقرب اتنين لبعض، وصداقتهم بتتحط في اختبار لما واحدة منهم بتبدأ تكوّن عيلة والتانية بتتعب وبيجيلها كانسر.

Me and Earl and The Dying Girl 

جريج، طالب في الثانوية، وبيقضي معظم وقته في صنع محاكاة ساخرة للأفلام الكلاسيكية مع زميله إيرل، لكن نظرته بتتغير للأبد لما بيبقى صديق لبنت اتشخصت بالسرطان.

 

The Fault in Our Stars

قصة رومانسية وإنسانية جدا عن اتنين في سن المراهقة مصابين بالسرطان بيتعرفوا على بعض وبيبدأوا رحلة حب، ورحلة لزيارة مؤلف منعزل في أمستردام 

Lullaby

رجل عايش بعيد عن عيلته بيعرف إن أبوه قرر ينفصل عن أجهزة دعم الحياة خلال 48 ساعة بس

The Bucket List

اتنين عندهم سرطان بيهربوا من جناح السرطان في المستشفى وبيسافروا في رحلات مع بعض عشان يحققوا قائمة أمنياتهم قبل ما يموتوا

My sister’s keeper

أب وأم عندهم بنت مصابة باللوكيميا، وخلفوا بنتهم الأصغر “آنا” عشان تبقى متبرعة بنخاع العظم لأختها المريضة، وآنا خضعت لعمليات جراحية كتير في حياتها القصيرة، ولما آنا بترفع قضية على أبوها وأمها عشان تتحرر منهم طبيا، فالقضية القانونية دي بتكون سبب ممكن يدمر العيلة نهائيا

Letters to God

طفل مصاب بالسرطان بيكتب رسايل لـ ربنا، وبيلمس قلب أي حد بيصادفه، وساعي البريد اللي بيستلم الرسايل بيلاقي نفسه مشارك في حياة الولد وعيلته بسبب قراءة الرسايل وإنه مش عارف يعمل بيها إيه أو يوديها لمين، والرسايل دي بتلهمه إنه يسعى لحياة أحسن وعشان ابنه اللي خسره بسبب إدمانه للكحول

A Little Bit of Heaven 

بنت جميلة دايما بتستخدم الهزار وخفة الدم عشان تواجه بيها مشاكلها وأزماتها في الحياة، وبتروح لدكتور بيبلغها إنها عندها سرطان، ومن وقتها حياتها بتتغير بشكل غير متوقع.