في اليوم العالمي لـ “اللغة العربية” ايه هو تاريخ نشأتها وعلاقتها باللغات الأخرى؟

بكِ تاجُ فخري وانطلاقُ لساني .. ومرورُ أيامي ودفءُ مكاني

لغة الجدودِ ودربُنا نحوَ العُلا .. وتناغمُ الياقوتِ والمَرجان

 

• عبد الرزاق الدرباس

بمناسبة اليوم العالمي لـ “اللغة العربية” خلونا نتعرف على نشأتها وعلاقتها باللغات الأخرى.. اللغة العربية أو لغة الضاد اتسمت بالاسم ده عشان هي اللغة الوحيدة اللي فيها حرف الـ”ض” وكمان العرب هم أفصح الناس اللي نطقوا الحرف ده.. وعشان هو صعب النطق عند غير العرب وكمان في صعوبة إنهم يلاقوا صوت بديل له في اللغات بتاعتهم فا اتميزت اللغة باسم “لغة الضاد”.. تعالوا ناخد جولة ونعرف عن تكوين ونشأة اللغة العربية وكمان علاقتها باللغات التانية.

نشأة اللغة العربية:

اللغة العربية هي اللغة الرسمية لـ 22 دولة وبيتكلم بيها أكتر من 400 مليون شخص حول العالم، وتعتبر عضو في عائلة “اللغات السامية” ودي فرع من عائلة اللغات “الأفرو آسيوية” وبتنسب اللغة السامية للساميين وبتضم لغات تانية زي العبرية والآرامية والأمهرية.. مفيش معلومة محددة ومؤكدة عن تاريخ معين لنشأة اللغة وفي فريق بيقول إنها نشأت القرن الخامس الميلادي وفي شبه الجزيرة العربية.. واللي كانت موطن لقبائل مختلفة بتتكلم بلهجات مختلفة من اللغة العربية.. يعني زي دلوقتي الاختلاف في المناطق في مصر منها وجه بحري والقاهرة والصعيد.. لأنها كانت لغة منطوقة وبيستخدموها في التجارة والشعر ورواية القصص.

مكانتها:

على الرغم إن مفيش أصل وإثبات لتاريخ بدايتها..  لكن حسب منظمة اليونيسكو بدأت في شبه الجزيرة العربية تحديداً في الشمال الغربي، وهي تعتبر لغة عالمية عشان بيتكلم بيها أكتر من 350 مليون ناطق أصلي وأكتر من 250 مليون بيتكلموا كـ لغة تانية وبكده تعتبر خامس لغة عالمياً من حيث الانتشار والإحصائيات دي لسنة 2023 حسب موقع مدرسة Middlebury للغات

الأبجدية وطريقة الكتابة:

اللغة بتتكون من 28 حرف زي ما كلنا عارفين من “أ” لحد “ي” وده كان بتكلفة من الحجاج بن يوسف الثقفي في التلت الأخير للقرن الأول الهجري للنحوي نصر بن عاصم الليثي بالترتيب اللي احنا عارفينه،وفي نصف القرن الأول هجرياً أبو الأسود الدؤلي عالم اللغة العربية عشان يشكل القرآن كان بيحط نقطة تحت الحرف عشان يكسره ونقطة على شماله عشان يضمه ونقطتين فوقه أو تحته أو على شماله عشان التنوين وكان بيسيب الحرف الساكن من غير نقطة خالص وده كان تشكيل مخصص للقرآن بس.. ولكن الخليل بن أحمد  في القرن التاني الهجري طور التشكيل أكتر عشان يتم إستخدامه في اللغة بشكل عام فا حط ألف صغيرة فوق الحرف تكون فاتحة وياء صغيرة تحته تكون كسرة وواو صغيرة فوقه عشان تكون ضمة ولو في تنوين الحرف يتكرر مرتين وفي النهاية اتطور التنوين للوضع الحالي.

وقبل نهاية العصر الأموي دخلت اللغة العربية مجال الكتابة بدل ما كانت لغة بتتنطق بس.. وبرضه بعد فترة بقت كل دولة بتنطقها بشكل خاص بيها ولكنها في النهاية ليها شكل قياسي كلنا بنتعلم وندرس بيه.

علاقتها  باللغات الأخرى:

الانجليزي
اللغة العربية أثرت بشكل مباشر أو غير مباشر في لغات كتير.. والمثال على ده حاجات كتير في اللغة الانجليزية مكتسبة منها زي:
الكيمياء – Chemistry
الكحول – Alcohol

القهوة – Coffee

الكهف – Cave
جمل – Camel

وأمثلة كتير اتأثرت بيها كلمات في لغات تانية بالعربي.. 

الفرنساوي

كمان الفرنسيين استخدموا مصطلحات كتير جداً أصلها كان من اللغة العربية ومن الكلمات دي:

جيتار – Guitare
كنبة – canapé

قائد – Caïd

خرشوف – Artichaut

الأسباني

زيت – Aceite
زيتون – Aceituna
سكر – Azúcar

مخدة – Almohada

العلم

الناحية العلمية كمان نقل علماء الغرب من العرب الحرف الجبري “X” واللي كنا بناخد بيها أمثلة في الفيزيا دايماً.. بيمثل رقم مش معروف ونشأ الحرف من الكلمة العربية اللي هي “الشيء” “Shay” واللي اترج مت في النهاية لـ “Xay” في أسبانيا فا اختصروها في الآخر واستخدموها في الجبر لحد دلوقتي بحرف “X”.

وكمان القصة الشهيرة بتاع العالم الكبير مؤسس علم الجبر محمد بن موسى الخوارزمي.. اللي اخترع الأرقام واتنقل لأوروبا من التجار العرب بالشكل بتاعه “…,3,2,1”

في النهاية اللغة العربية لغة عريقة وقديمة ليها قيمتها.. تاريخها بيرجع لـ أكتر من 1500 سنة ومش هنلاقي تعبير عن جمالها أقوى من مدحها في الأبيات الشعرية للشاعر سليمان عيسى اللي بيقول فيها:

أنا ما بَرِحْتُ تألُقاً وسَنَا .. لغة العروبةِ والبَقاءِ أنا

في بُرْدِي التاريخُ أنْسُجُهُ .. شِعراً ونثراً أبْهرُ الزمَنَا
أطوي العُصُور وما شكوتُ بها .. في بُنْيتي ضعْفاً ولا وَهَنا
عُمري هو التاريخ لا تَسَلُوا .. عن موْلِدي في فجْرِه اقْتَرَنا