ليه الإنسان ممكن يأذي حيوان أليف؟

من فترة للتانية بتنتشر فيديوهات وصور لحيوانات تم تعذبيها أو معاملتها بقسوة أو قتلها بلا رحمة، وده بيخلينا نتسأل.. ليه في شخص ممكن يعذب حيوان أليف ضعيف لا حول له ولا قوة؟

مبدئيًا محتاجين نعرف إيه هو إساءة معاملة الحيوانات؟ الإساءة بتشير على فعل متعمد يسبب ضرر للحيوان أو عدم اتخاذ قرار ممكن يأذي الحيوان برضه، زي مصارعة الكلاب وتعذيبها، أو إهمالها زي عدم توفير الأكل والمياه أو مأوى للحيوان ويفضل مرمي في جنينة أو بلكونة مش في بيت بيحميه من برد الشتاء أو حرارة الصيف، والكلام هنا على الحيوانات الأليفة على سبيل المثال “القطط والكلاب”وفي أنواع مختلفة لإساءة الحيوانات زي الحبس والضرب

لو بدأنا نتكلم عن مرحلة الطفولة مثلا، فا الأطفال اللي بيسيئوا معاملة الحيوانات هما ممكن يكونوا نفسهم تعرضوا لسوء معاملة، لإن في علاقة بين الإساءة للحيوانات والعنف بين الأشخاص، يعني ممكن يكون المعتدي هو شخص ضحية أو حتى عاش حياة مليانة بالعنف سواء في البيت أو تعرض لإساءة جسدية

وفي دراسة تانية، الباحثين اختبروا فرضية بتقول أن القسوة على الحيوانات مرتبطة بتشخيص اضطراب الشخصية المعادية للمجتمع “APD” وبحثوا على اضطرابات تانية مربوطة بنفس الموضوع

ودراسة وجدت إن الأشخاص اللي بيكونوا قاسيين على الحيوانات هما أكتر عرضة بتلات مرات إنهم يرتكبوا جرائم تانية بما في ذلك القتل والاغتصاب والسرقة والمخدرات وجرائم تانية.

التربية هي أساس كل شيء في الحياة، التربية السليمة من الأب والأم هي اللي ممكن تحمي المجتمع من قاتل متسلسل أو مجرم بيعذب حيوان ضعيف لا يملك القدرة على رد الضربة، من المهم إن الأهالي تنتبه لأبنائها لإن كل اللي بنشوفه حاليا في العالم من ضرب وتعذيب وقتل حيوانات هو نتيجة نشأة خاطئة في الصغر.

Related Articles

Back to top button