حكاية ريال مدريد مع البديل الذهبي

ريال مدريد نادي دايمًا موعود بالبدلاء الذهبيين والموسم ده بالرغم إن النتائج مش أحسن حاجة حتى الأن بس جه اسم جديد عشان يكون منهم وهو “كارلوس إسبي” المهاجم الشاب اللي ريال اتعاقد معاه من ليفانتي وكان مفاجأة مورينيو ودخل بديل قدام إسبانيول في أول مباراة له وسجل هدف الفوز في الدقيقة الأخيرة وكرر نفس السيناريو قدام إلتشي ودخل بديل قبل النهاية بـ3 دقايق بس وسجل هدف الفوز بعد 4 دقائق من نزوله وكمان سجل هدف قدام ريال بيتيس كان هيكون التعادل بس اتلغى بسبب التسلل.. فجمعنالكم البدائل الذهبية لريال مدريد في السنوات الأخيرة

خوسيلو.. البديل الذهبي للفوز بالأبطال موسم 2024

خوسيلو اللي كان بديل ذهبي ودخل تاريخ الريال من سنتين لما دخل بديل في نص نهائي دوري الأبطال قدام بايرن ميونخ والريال خسران 1-0 وسجل هدفين في تلات دقايق قدام الحارس الخبرة “نوير” قلبوا النتيجة وخلت التأهل للريال بنتيجة 4-3

عشان بعدها الريال يلعب النهائي قدام دورتموند ويكسب بنتيجة 2-1

رودريجو.. بطل الـ”فما حاجة”

رودريجو كان على طول دكة قبل ما يكون أساسي في الريال كان واحد من البدلاء الذهبيين بردوا ودخل بديل في نص نهائي دوري الأبطال قدام مانشستر سيتي والريال خسران 1-0 وشبه خارج من البطولة وقدر يسجل هدفين في الوقت بدل الضائع (الدقيقة 90 و90+1) عدلوا النتيجة ووصلوا

 للوقت الإضافي اللي حسمه بنزيما بضربة جزاء.. وبعدها يفوز ريال مدريد بالبطولة في النهائي قدام ليفربول 1-0

  ناتشو.. الجندي الوفي لريال مدريد

واحد من اللاعيبة اللي خد حقه متأخر كان ناتشو اللي قعد 23 سنة في الريال من غير ما يكون أساسي دايمًا لكنه كان حاضر في اللحظات المهمة وكان من ضمن اللي سجلوا في ضربات الترجيح التاريخية قدام مانشستر سيتي في ربع نهائي دوري الأبطال وخرج من الريال بـ26 لقب يعادل بيهم مودريتش كأكتر لاعبين تحقيقًا للألقاب في تاريخ النادي

خيسيه رودريجز.. مهاجم الإصابة ضيعته

وخيسي رودريجيز لما طلع من أكاديمية الريال في 2011 وكان دايمًا خيار  مهم من الدكة رغم إنه مكنش أساسي ثابت ولعب دور في الفوز بدوري الأبطال مرتين (2014 و2016) وقدر في آخر موسم مع الريال 2016 يسجل 6 أهداف ويصنع 6 زيهم.. قبل ما إصابة الرباط الصليبي تؤثر على مشواره.

أسينيسو.. بديل تسديداته صاروخية

وأسينسيو اللي اشتهر إنه بيسجل في أول ظهور له في كل بطولة يلعبها وأشهر هدف ليه كان لما دخل بديل في نهائي دوري الأبطال 2017 قدام يوفنتوس في كارديف وسجل الهدف الرابع اللي حسم اللقب وقفل مشواره كأكتر لاعب بيسجل كبديل في تاريخ دوري الأبطال بـ12 هدف.

تشيتشاريتو.. بطل ديربي مدريد في الأبطال

تشيتشاريتو جه معار من مانشستر يونايتد موسم واحد بس وكان بيدخل بديل غالبًا لأن المنافسة قدامه كانت شرسة مع بنزيما وبيل ورونالدو لكنه كان معروف قبل كده إنه من أكتر اللاعبين تسجيلًا كبديل في أوروبا في آخر 5 سنين قبل ما ينضم للريال.. ومعروف أكتر بهدف الفوز اللي سجله لريال مدريد قدام أتليتكو مدريد في ربع نهائي دوري أبطال أوروبا موسم 2015.. بس بعدها الريال خرج من يوفنتوس