في عيد ميلادها.. أبرز المحطات الفنية في مشوار الفنانة الصاعدة مها نصار
![](https://theglocal.com/wp-content/uploads/2023/10/Website-Thumb-1.png)
النهاردة عيد ميلاد الفنانة الصاعدة “مها نصار”.. تعالوا نتعرف على أبرز المحطات في مشوارها الفني اللي بدأته من 2010.
مها من مواليد 5 أكتوبر سنة 1995، واشتغلت في بداياتها كعارضة أزياء وراقصة باليه.
كان حلمها التمثيل من وقت ما كانت طفلة صغيرة، وقالت إنها من سن 5 أو 6 سنين كانت بتقولهم في البيت إنها هتشتغل ممثلة، وماكنتش شايفة أي حاجة تانية غير التمثيل.
بدايتها الفنية كانت من خلال مسلسل “اغتيال شمس” للمخرج مجدي أبو عميرة سنة 2010، وهو نفسه اللي رشحها لمسلسل “بفعل فاعل” سنة 2012 بعد كده.
لكن تعتبر الانطلاقة الحقيقية لـ مها نصار من خلال دور نعمة في مسلسل واحة الغروب، مع منة شلبي وخالد النبوي، ومن إخراج كاملة أبو ذكري، سنة 2017. مها قالت إن واحة الغروب كان يعتبر بدايتها الفنية مع المخرجة كاملة أبو ذكري، وبعدها بدأ المخرجين والمنتجين يلاحظوها أكتر، وإنها مش هتنسى إصرار كاملة أبو ذكري على اختيارها في المسلسل.
وفي الموسم الرمضاني اللي فات 2023، فاجئتنا مها نصار بـ 3 أدوار مختلفة، وكل دور فيهم بعيد تماما عن التاني، وكل شخصية منهم مختلفة ومتطورة بطريقتها الخاصة، وفي كل دور منهم عرفت تسيب بصمتها، وتشد انتباه الجمهور اللي أشاد بيها وبموهبتها على السوشيال ميديا، وبدأوا يعرفوا أكتر فنانة موهوبة اسمها مها نصار.
شاركت مها نصار في “سوق الكانتو” بشخصية “فاطمة” البنت الدلوعة اللي بتحاول تعيش مبسوطة على قد ما تقدر، مع محاولتها إنها ترضي والدتها وعيلتها.
أما في ضرب نار، لعبت شخصية “سحر” صاحبة ياسمين عبد العزيز، وكانت بنت شقية عندها لازمة خاصة بيها “يا مستر”، واللي خانت صاحبتها بعد كده.
وفي مسلسل “تحت الوصاية”، قدمت دور “سناء” أخت منى زكي، وقدمت شخصية بنت البلد الجدعة اللي واقفة طول الوقت مع أختها وبتدعمها وتساعدها، والجمهور أشاد بيها وبموهبتها في المسلسل.
في كل عمل من التلاتة، قدرت مها نصار تقدم شخصية مختلفة بتفاصيل مستقلة، وفي كل دور عرفت تتقنه وتقنع بيها الجمهور.
ومن أشهر المسلسلات اللي شاركت فيها: سرايا عابدين – بين عالمين – طايع – ضد مجهول – الفتوة – الاختيار – الطاووس
ومن الأفلام اللي شاركت فيها: تسعة – تراب الماس – ريما