٧ طرق لتجنب ريحة الدم والزفارة خلال أيام العيد

موسم الدبح بدأ، بكرة أول أيام عيد الأضحى، ومن بعد الصلاة مباشرة لحد رابع يوم العصر البيوت والشوارع بيبقى ريحتها دم أو زفارة عشان الدبح.

ورغم إن ستات بيوت كتير بتستخدم منتجات تنظيف إلا إن الريحة مابتروحش بنسبة 99.9 % زي ما الإعلانات بتقول، وده بيعمل أزمة للناس اللي عندها مشاكل في الجهاز التنفسي أو في مناخيرهم.. إحنا في “ذا جلوكال” بننصحك بـ 7 طرق ممكن تتبعهم عشان ندبح براحتنا ومانتأثرش بالريحة:

1- الخل والملح

استخدمي الخل والملح وإنتي بتنضفي الأرضيات اللي عليها دم، هتفرق في التطهير والريحة

2- شرايح الليمون والمياه

استخدمي شرايح الليمون في جردل المياه اللى بتمسحي بيها، وممكن تعصري ليمون كمان وتزودي على المياه دي مسحوق تنضيف.

3- الفانيليا

حطي فانيليا في مياه التنضيف وسيبي المياه على الأسطح شوية، وبعدها امسحي البيت بمياه فيها معطر أو مسحوق تنظيف.

4- الخل ومسحوق تنضيف

حطي على مياه المسح خل ومسحوق غسيل وامسحي بيهم الأرضيات.

5- ادبحوا في المدبح 

اشتروا الأضحية وادبحوها في أقرب مدبح ليكوا، عشان تبعدوا الريحة عن البيت والشارع.

6-  سافر واهرب 

سافر السخنة أو الساحل أو أي مكان فيه بحر مايكونش فيه ريحة دبح، لو بتضايق أو عندك مشاكل في الجهاز التنفسي.

7- الكمامة

اشتري كمامة من أقرب صيدلية ليك وعيش أيام العيد بيها واهو بالمرة تحمي نفسك من دور البرد أو كورونا المنتشر اليومين دول.

Related Articles

Back to top button