في اليوم العالمي للقلب.. معلومات عن أمراض القلب ونصايح عن إزاي تحمي قلبك

يوم 28 سبتمبر هو اليوم العالمي للقلب.. واليوم ده جزء من حملة دولية هدفها التوعية بأمراض القلب والسكتات القلبية.

وبالمناسبة دي، إحنا جمعنالكم مجموعة معلومات ونصايح “ممكن تبقى بديهية” بس في نفس الوقت مهمة حسب موقع وزارة الصحة الأمريكية US Department of Health and human services

لما الدكاترة بيتكلموا عن أمراض القلب فهم عادة بيتكلموا على أمراض القلب التاجية CHD، وأحيانا بيبقى اسمها مرض الشريان التاجي CAD، وده أكتر نوع مشهور من أمراض القلب.

لما الشخص بيصاب بأمراض القلب التاجية، بتكون الشرايين التاجية اللي بتنقل الدم للقلب ضيقة أو مسدودة، وده بيحصل لما بيتراكم الكولسترول أو المواد الدهنية جوه الشرايين، وفيه حاجات ممكن تسبب التراكمات دي جوه الشرايين زي: زيادة نسبة الكولسترول في الدم – ضغط دم مرتفع – التدخين – زيادة نسبة السكر في الدم بسبب مرض السكري.

ولما الشريان بيتسد، ده بيصعب وصول الدم للقلب، وممكن الشريان المسدود ده يسبب ألم في الصدر أو نوبة قلبية، ولو عايز تعرف معلومات أكتر عن أمراض القلب التاجية ممكن تشوف الموقع ده.

ممكن أي حد يصاب بأمراض القلب بس أكتر أشخاص معرضين للإصابة بأمراض القلب هم:

  • اللي عندهم ارتفاع في نسبة الكوليسترول أو ارتفاع ضغط الدم أو مرضى السكري
  • المدخنين
  • اللي بيعانوا من السمنة أو زيادة الوزن
  • اللي مش بيمارسوا أي نوع من النشاط أو الحركة
  • اللي بياكلوا أكل غير صحي كتير
  • ده غير طبعا اللي عندهم وراثة للمرض في عائلاتهم 

طبعا معروف إن أمراض القلب هي السبب الرئيسي لوفاة عدد كبير من الناس حول العالم، وفيه خطوات الشخص ممكن يحاول يلتزم بيها عشان يقلل من إحتمالية إصابته بأمراض القلب حسب موقع US Department of Health and human services زي: 

  • زيادة الأكل الصحي 
  • الحركة والرياضة وأي نوع من النشاط
  • المحافظة على وزن صحي للجسم
  • الإقلاع عن التدخين
  • محاولة السيطرة على الكوليسترول وضغط الدم
  • السيطرة على معدلات التوتر

وفي النهاية، بنتمنالكم السلامة والصحة دايمًا.

Related Articles

Back to top button