٥ أسباب عشان تحضن القطط بتاعتك باستمرار
![](https://theglocal.com/wp-content/uploads/2021/12/50.png)
القطط دايما واخده سمعة إنها منعزلة وانطوائية مش زي الكلاب بتحب صاحبها ومخلصة له وبتلعب معاه وبتسليه، لكن ده كله كلام مش حقيقي، فيه قطط كتير بتبقى حنينة بشكل مبالغ فيه، وبدل ما إنت اللي تروح تحضنها هي اللي بتيجي تحضنك وتخليك تلعب معاها بالعافية، ولو كنت متضايق أو بتعيط هي اللي هتيجي تلمسك.
يوم 4 يونيو من كل سنة هو يوم إنك تحضن القط بتاعك، ويمكن فيه أسباب كتير أوي عشان تحضن القطط بس خلينا نقولك 5 أسباب قالهم موقع arapahoe animal hospital احتفالا باليوم ده:
1- الترابط:
القطط بتحب الناس تبين إنهم بيحبوها، وبمجرد ما تشيلها من وتبدأ تحضنها هتلاقيها بدأت تعمل أصوات زي الخرخرة واحتوائك لقطتك كمان هيساعدها تبقى مبسوطة ومستريحة، والمحافظة على اللعب والأحضان والتواصل هيخلي فيه ترابط بينكوا.
2- تنشيط الخرخرة:
صوت الخرخرة اللي بيطلع من القطط في بعض الأوقات ده تم إثبات إنه له مميزات، لإن تردد خرخرة القطة بيكون بين 25- 140 هيرتز، وتم إثبات إن الأصوات دي بتعزز الشفاء وبتستخدم في العلاج الطبيعي.
3- الراحة:
ممكن حضنك لقطة صغيرة وقت حتى لو قليل يبقى بيساعدك لإنه هيهديك خصوصا لو إنت من الأشخاص اللي بيمروا بأوقات صعبة، لإن القطط أصلا بتساعد أصحابها إنهم يتخطوا مشاكل القلق والاكتئاب والصدمات واضطراب ما بعد الصدمة، ودي واحدة من الأسباب اللي بتخلي الناس يربوا قطط كتير أصلا.
4- الابتسامة:
صعب جدا ويمكن يبقى مستحيل إنك لما تشيل قطة أو تلعب معاها أو تحضنها ماتضحكش بعد وقتها، خصوصا لو القطة مبسوطة إن حد شايلها أو بيلعب معاها وبتستجيب فبتكون لطيفة جدا لو مبسوطة، وبتعمل حركات لطيفة جدا زي إنها بتدعك ودنها بإيدها وهي مغمضة عنيها أو بتغمض عينيها.
5- الفحص:
كتير من القطط بيحبوا الأماكن المرتفعة في البيت، ولو حضنت القطة بتاعتك هتقدر تهديها وعلى الأقل كمان هيبقى عندك فرصة تفحص المكان اللي هي عاملاه مملكة ليها في مكان مرتفع.
بس خليك عارف إن مش كل القطط برضه بتحب الأحضان ومش كل الأوقات، فيه قطط بتحب بصات الإعجاب واللعب من بعيد لبعيد، فلو كان القط بتاعك مابيحبش الأحضان حاول تقرب منه أكتر وتتكلم معاه وتقدم له شوية ألعاب وأكل بتحبه، وحتى لو كانت قطتك بتحب تتحضن فلما تبقى عايزة تنزل سيبها تنزل.