أشهر 6 مواقف بيتكرروا في الكوافير
رحلة الكوافير أساسية في حياة كل أنثى على الأقل مرة في الشهر حتى لو كل شهرين برضه مرة، بس أساسي هتروح لأسباب وأغراض مختلفة ولكن كل واحدة فينا بيبقى ليها طريقة في التعامل مع الكوافير أو الكوافيرة يعني مثلا هنلاقي فيه الاجتماعية اللي الكوافير عارف تفاصيل حياتها وبقى فرد من العيلة خلاص، وفيه المنعزلة اللي بتحب تدخل تعمل اللي عايزاه وتمشي على طول في صمت، وفيه المستعجلة دايما وفيه اللي بتروح تعطل المكان كله عشان بتعمل كل حاجة في نفس اليوم.
وبالرغم من اختلاف شخصيتنا في التعامل مع الكوافيرات إلا إننا بنضطر نصبر عشان نمشي أمورنا وناخد اللي عايزينه من غير حد فيهم ينتقم مننا عشان الغلطة بتزعلنا جامد في الحالات دي.
الكوافيرات أو خبراء التجميل مش كلهم متعبين طبعا بس هيفضل عندنا شوية مشاكل معاهم أغلب الوقت بتتعبنا لما نروحلهم.. جمعنا أشهر المواقف والجمل المتعبة للكوافيرات:
1- مين اللي اشتغل هنا قبلي؟:
نفس فكرة الصنايعية في البيت لما حد يكمل على شغل حد، لازم يقول جملة “مين اللي اشتغل هنا قبلي؟” ويشتمه طبعا، هيضايق أو هتضايق جدا لو حد تاني اللي قص شعرك أو عمل حواجبك غيره/ غيرها.. وهيبدأوا في مرحلة التعديل وللأسف مش هتقومي غير وأنتي راضية أو لما تقولي إن أه طبعا كده أحلى وتسلم ايديك.
2- قص الأطراف:
دي معضلة عالمية مش في مصر بس للأسف العالم كله بيعاني منها، يعني لو عايزة تقصي أطراف شعرك هتلاقي شعرك مقصوص “بيكسي” واعترضي قد ما تعترضي اعتراضك مالوش لازمة.. هو أو هي اللي ماسكين المقص وشعرك ومش هيحصل غير اللي هما عايزينه أو شايفينه، وده بيحصل عن طريق حاجتين لو أنتي مطيعة ومرنة هيقنعوكي، أما لو هتغلبيهم وتناهدي كتير هتتغفلي وبرضه هتقص الأطراف اللي على مزاجها.
3- عندي ليكي زيت:
في الغالب بيبقى فيه منتجات الكوافير بيبعها وبيبقوا عايزين يسوقوها وفي الحالة دي بتبقى أو بيبقى سيلز وكوافير لحد ما يجيبوا كوافير.. ولو الكوافير ماعندوش منتجات تتباع هيبقى فيه محاولات إقناع بالقص أو الصبغة وده بالرجوع لنقطة 1 واللي هي مين اللي اشتغل قبلي هنا فتقتنعي ويبقوا سيلز وكوافير بالفعل.
4- المشاكل الشخصية:
دي مشكلة بتواجه الستات عند الكوافير والرجالة عند الحلاق إنهم بيتكلموا كتير أوي، لكن خلينا نقولك مبرر إن ده جزء من شغلهم إنهم يبقوا اجتماعيين عشان زي ما بيقولوا كده “يعملوا زبون”.. ومن هنا بيبدأوا يتكلموا معاك في مشاكلهم في الحياة ويسمعوا منك كمان لو عايزة وتبقوا أصحاب حتى لو أصحاب لمجرد ساعة عشان تستريحي وتروحيلهم تاني.. بس برضه خدي مسكن للصداع وأنتي رايحة مشوار الكوافير.
5- اكتساب الثقة:
طبعا عشان ماتحسيش إنها أو إنه بيفرضوا عليكي وجهة نظر معينة عنهم إنهم شطار في شغلهم.. فالطريقة المثالية إنهم بيحاولوا يتكلموا كتير عن سابق أعمالهم في المجمل، ويا سلام لو الأعمال السابقة دي لفنانين أو عرايس غالبا هتشوفي الصور كمان، وممكن شوية كلام عن شهادات ومسابقات تفوقوا فيها وكل ده لاكتساب ثقتك بس بطريقة غير مباشرة.
6- رأيك مايهمناش:
في الطبيعي أي حد شغال مع “كلاينت” هياخد رأيه في الشغل قبل وبعد وأثناء الشغل ما بيتعمل، بس الكوافير لا، هو شايف هو بينفذ وأنتي كده حلوة واسمعي الكلام وامشي على الرولز وبلاش تضايقيهم.
