أنواع الضغط النفسي.. وإزاي تعرف إنك بتعاني منه! 

سمعنا كتير من ناس كلمة معلش أصلا مضغوط نفسيًا اليومين دول، فيه مننا اللي افتكر الشخص بيتدلع وفيه اللي افتكر ده يعني أكيد بيمر بأزمة أو اللي فكر إن ممكن يبقى عنده مشاكل أو مسؤوليات كتير الفترة دي.. ولكن الضغط النفسي أو الـ Stress هو من شكل من الاشكال اللي بتواجه سلام الصحة النفسية لناس كتير أوي.. وبمناسبة دي هنعرفك بيه أكتر.

الضغط النفسي معروف علمياً بالتوتر وهو الطريقة الطبيعية اللي بيدافع بيها الجسم عن نفسه ضد المخاطر اللي بيتعرضلها الإنسان وده اللي بيسبب إن الجسم يغرق في الهرمونات اللي بتهيء أنظمة وأجهزة الجسم لمواجهة الخطر أو التهرب منه.

في أوقات بيوصل الضغط النفسي لحالة مزمنة لو الشخص ماتعاملش معاه بشكل صح.. ولكن الضغط النفسي له أنواع حسب ما قال موقع “الطبي” في مقال من مقالاته وهما:

1- الضغط النفسي الروتيني اللي بيكون بسبب لمسؤوليات الروتينية في الحياة اليومية للشخص زي رعاية الأطفال والدراسة والمسؤوليات المادية.

2- الضغوط النفسية المفاجئة وهي اللي بيتعرض لها الشخص بشكل مفاجئ وبتسبب له توتر شديد زي مثلا موت فرد من الأسرة أو إنه يكتشف إنه مصاب بمرض مزمن أو إنه يفقد شغله.

3- الضغوط النفسية اللي بتكون بعد صدمة نتيجة إن حصل حادثة كبيرة زي الحروب والكوارث ويرتبط النوع ده من الضغوط بحالة نفسية تانية اسمها “اضطراب الكرب التالي للرضح”.

4- الضغوطات المزمنة واللي بيتعرضلها الشخص بشكل دائم زي الجواز الغير سعيد، أو المشاكل الأسرية.

موقع “mind” كمان رد في أحد مقالاته عن الـ “Stress” على سؤالين مهمين أولهم هو الشخص المضغوط بيحس بإيه؟، وتاني سؤال إيه هي العلامات الجسدية اللي بتظهر على الشخص المضغوط نفسيًأ.

وبالنسبة لأول سؤال وهو ” الشخص المضغوط بيحس بإيه؟” كانت الإجابة:

1- بيحس إنه متعصب وغضبان وماعندهوش صبر

2- بيحس إنه تقيل ومغلوب على أمره 

3- بيحس بقلق أو إنه عصبي وخايف 

4- بيحس إنه فيه سباق أفكار في دماغه مش قادر يوقفه أو يسيطر عليه

5- بيحس إنه مش مبسوط بنفسه 

6- بعض الأوقات بيحس إنه مكتئب 

7- بيكون مش مهتم بالحياة 

8- بيفقد روح الدعابة وبيبقي مش عارف يهزر 

9- بيحس إنه مهمل ووحيد 

وبالنسبة للأعراض الجسدية اللي ممكن الشخص يعرف منها إنه بيمر بضغط نفسي فهي:

1- نوبات ذعر أو “Panic attacks” وصداع مزمن وآلام في الصدر 

2- مشاكل في النوم وآلام في العضلات وارتفاع ضغط الدم 

3- تغيير في الشهية بيسبب زيادة الوزن المفاجئة أو فقدان الوزن 

4- عدم وضوح الرؤية أو التهاب العيون

5- عسر الهضم أو الحموضة المعوية

6- إمساك أو إسهال والإحساس بالغثيان أو الدوار 

ولو الشخص كان بيعاني من التوتر لفترة طويلة فهتزيد الأعراض دي وممكن أغلب الأعراض دي أصلا تحصل لأي شخص بيعاني من الإجهاد فترة طويلة عشان كده من الأفضل إن شخص مختص هو اللي يشخص ويقول هل ده توتر ولا إجهاد جسدي 

وأخيرًا إزاي الضغط النفسي بيأثر على حياة الشخص وبيبان إزاي عليه في شكل نفسي:

1- إنه بيواجه صعوبة إنه ياخد قرارات 

2- صعوبة في التركيز وصعوبة في إنه يفتكر أي حاجة 

3- بيأثر على الشخص إنه بيخلي ذاكرته مشوشة شوية وبتكون أبطأ من الطبيعي 

4- أكل الأظافر 

5- الضغط على الفك والأسنان وهرش الجلد 

6- المعاناة من مشاكل جنسية زي فقدان الرغبة الجنسية 

7- الأكل الكتير أوي أو القليل أوي 

8- التدخين أو تعاطي المخدرات أو شرب الكحوليات أكتر من المعتاد 

9- الشخص بيكون مش قادر يهدى زي كأنه بيتحرك ومابيقدرش يقعد 

10- الشراء الزيادة عن اللزوم 

11- الشخص مابيكونش قادر يمارس رياضة بنفس القدرة اللي كان عليها قبل كده أو ممارسة الرياضة أكتر من اللازم 

12- الانعزال عن الناس 

Related Articles

Back to top button