أهم 6 أعمال جسدت معاناة الحروب

جزء من العالم حاليا بيعيش لحظة استثنائية بسبب الغزو الروسي لأوكرانيا، والأحداث اللي بتحصل مجرد بنسمع عنها أخبار عادية، ولكن أي حرب أو نزاع بيحصل في أي منطقة في العالم بيكون حدث مؤثر ومش هين على الناس اللي بيعيشوه، وفي أفلام ومسلسلات كتير حاولت تبين لنا الجزء الصعب من الحرب وهي مش مجرد جزء ولكن كلها بتبقى صعبة على كل الأطراف، ولذلك قررنا نرشحلك 6 أعمال حربية قدرت تجسد جزء من مأساة الحرب بشكل سينمائي مميز

1- فيلم Saving Private Ryan:

كتيبة أمريكية بقيادة الكابتن ميلر بتاخدنا في رحلة بحث عن الجندي “ريان” خلف خطوط العدو عشان يرجعوا لأمه اللي فقدت أبنائها الثلاثة في الحرب وماتبقاش غير ريان، وفي الرحلة دي بنشوف الكتيبة وهي بتخوض معارك مختلفة

2- فيلم Fury:

خلال الحرب العالمية الثانية عام 1945، بيتجه الرقيب “واردادي” اللي بيقود طاقم من خمسة جنود في مهمة صعبة خلف خطوط العدو واللي بيقابلوا فيها صعوبات كتير

3- فيلم Hacksaw Ridge:

الشاب الأمريكي “ديزمونت دوس” التحق بالجيش الأمريكي خلال الحرب العالمية الثانية كمٌسعف ورفض إنه يحمل أي سلاح خلال الحرب، هتشوفوا في الفيلم رحلة “دوس” وهو بيشارك في إنقاذ المٌصابين وهو أعزل ورافض قتل أي إنسان تحت مسمى الحرب، والفيلم كمان عن قصة حقيقية

4- فيلم Dunkirk:

قصة الفيلم بتدور أحداثها عن عملية إجلاء لجنود محور الحلفاء “بريطانيا وفرنسا وبلجيكا وهولندا” اللي عددهم كان أكتر من 300 ألف جندي واتحاصروا من الجيش الألماني عند شاطئ “دونكيرك” في فرنسا لعدة أيام خلال الحرب العالمية الثانية

5- فيلم 1917

خلال الحرب العالمية الأولى، اتنين من الجنود البريطانيين بينطلقوا في رحلة عشان يوصلوا رسالة مهمة لزمايلهم واللي هتنقذهم من فخ محضره الجيش الألماني ليهم

6- مسلسل Band of Brothers 

المسلسل بيحكي عن تاريخ سرية “إيزي” وهي جزء من فوج مشاة مظلي، وبياخدنا المسلسل في رحلة بداية من تدريباتهم مرورا بمشاركتهم في عمليات عسكرية في أوروبا لحد نهاية الحرب العالمية الثانية