التموين تبدأ خدمة تسجيل أرقام المحمول على البطاقات في موقع “دعم مصر”.. وخطوات التسجيل
وزارة التموين والتجارة الداخلية بدأت فى إضافة أيقونة جديدة خاصة بتسجيل رقم الموبايل على بطاقات التموين من خلال موقع دعم مصر، وصاحب بطاقة التموين اللي ظهرت له رسالة على بون صرف الخبز أو السلع المدعمة بتفيد إنه لازم يسجل رقم الموبايل يقدر يدخل على الموقع عشان يسجل رقم تليفونه إلكترونيًا من غير ما يضطر يروح مكاتب التموين.
وجيه قرار تسجيل أرقام التليفونات على بطاقة الدعم أولًا عشان يسهل التعامل مع المواطن فى الدعم اللي بيتم تقديمه ليه، وكمان عشان يتم تحديث قواعد بيانات مستفيدي الدعم اللي بيوصل عددهم لـ 72 مليون مواطن وده للخبز بس.
والجدير بالذكر إن الدكتور على المصيلحى وزير التموين والتجارة الداخلية قرر إن يتم مد فترة تسجيل أرقام التليفونات للمواطنين اللي تم إرسال رسالة ليهم على بون الصرف لحد يوم 30-6-2022، وقال إن قرار مد الفترة ده عشان يتم التسهيل على المواطنين فى تقديم أرقام التليفونات لمكاتب التموين ومنع التكدس والزحمة قدام المكاتب.
الدكتور عمرو مدكور مستشار وزير التموين للتكنولوجيا ونظم المعلومات قال إنه هيتم بداية خدمة جديدة وهي إن أصحاب البطاقات التموينية هيقدروا يسجلوا رقم الموبايل عن طريق موقع “دعم مصر” وده بداية من عصر اليوم الثلاثاء 17 مايو 2022 وده كله فى إطار حرص الدكتور على المصيلحى وزير التموين والتجارة الداخلية في تسهيل حصول أصحاب البطاقات التموينية على الخدمات وتسجيل رقم المحمول كمان فى مكاتب التموين.
وطلب الدكتور عمرو مدكور من أصحاب البطاقات التموينية اللي بتجيلهم رسايل على بون صرف الخبز أو بون صرف السلع التموينية بتفيد بكتابة رقم المحمول إنهم ضروري يدخلوا يسجلوا أرقام تليفوناتهم صحيحة، وإنها تكون بإسم صاحب البطاقة واللي هو “رب الأسرة “.
وكمل الدكتور عمرو مدكور وقال إن فيه بعض الناس اللي هما أصحاب البطاقات التموينية ماجالهمش أى رسائل على بونات صرف الخبز أو بونات صرف السلع بتقولهم يكتبوا رقم المحمول، وده لإنهم مالهمش فعلا أرقام محمول مسجلة وصحيحة.
وعشان تسجل أسهل حبينا نقولك على خطوات تسجيل رقم المحمول على بطاقات التموين من خلال موقع “دعم مصر”
1ـ ادخل موقع “دعم مصر الرسمي”
2- اضغط على قائمة الخدمات التموينية المتاحة
3- اكتب رقم التليفون المحمول
4- اختيار إعادة إرسال “الرقم السري” للهاتف المحمول
5- دخل رقم التليفون المحمول المسجل باسم صاحب البطاقة التموينية.
6- اكتب رقم البطاقة التموينية اللي هو مكون من 12 رقم
7- وآخر خطوة اضغط على أيقونة إرسال الرقم السري
