بعد تسجيل الهند 26 حالة إصابة.. اعرف إيه هي أنفلونزا الطماطم!

وسائل إعلام هندية أعلنت  النهاردة الصبح الخميس 26 مايو 2022 إنه تم اكتشاف 26 حالة مصابة بفيروس أنفلونزا الطماطم في بعض ولايات الهند، وخصوصا ولاية أوديشا في شرق الهند.

وقالت الصحف الهندية إن الفيروس ده فيروس معوي بيصيب الأطفال ونادراً ما بيصيب البالغين، وظهر في بداية الشهر الحالي في بعض الولايات الجنوبية زي ولاية “كيرالا”، ومن أعراض المرض إنه بيسبب طفح جلدي على الايدين والفم والقدمين وارتفاع في درجة الحرارة وبسبب جفاف للأطفال في وده في الفئة العمرية اللي بتتراوح بين سن 5 سنين وسن 9 سنين.

وأضافوا كمان إن المرض شديد العدوى وبيتطلب عزل الحالة من 5 أيام لأسبوع، لكن مش مرض خطير وسهل يتعالج. 

وحسب موقع “indianexpress” وموقع “healthlibrary” أنفلونزا الطماطم هي مرض فيروسي بيسبب ظهور بثور شبه الطماطم على الجلد، وتهيج في الجلد وجفاف للأطفال، وبيكون شكل البثور أحمر وبتبقي شبه الطماطم وعشان كده اسمها حمى الطماطم أو أنفلونزا الطماطم وده معناه إن مالهوش علاقة بالطماطم.

وأعراض الفيروس الأولية هي:

1- ظهور بثور كبيرة بحجم الطماطم لونها أحمر

2- الطفح الجلدي

3- تهيج الجلد

4- ارتفاع في درجة الحرارة

5- جفاف الجسم

6- تورم المفاصل

7- غثيان

8- القئ

9- سعال

10- عطس

11- سيلان الأنف

وبالرغم من إن أنفلونزا الطماطم مرض معدي إلا إنه مسؤولين الصحة طمنوا الناس وقالوا إنه مش مميت وممكن يتعالج لكن مهم تجنب الاتصال الوثيق مع الطفل المصاب، وده كمان لمنع انتشار المرض.

ودي الخطوات اللي ممكن أي شخص يعملها لو عنده طفل اتصاب بأنفلونزا الطماطم:

1- طهر بيتك باستمرار

2- ماتخليش الطفل يهرش البثور

3- حافظ على رطوبة الطفل عن طريق إنك تخليه يشرب مياه كتير

4- استخدم مياه دافيه لحمى الطفل 

5- اتجنب الاتصال المباشر بالطفل

6- عقم الهدوم والأطباق وأي حاجة بيستخدمها الطفل المصاب  

وبالنسبة لطرق العلاج من مرض أنفلونزا الطماطم فمفيش لحد دلوقتي أي علاج محدد لأنفلونزا الطماطم، وعشان كده صعب يتم السيطرة على المرض إلا من خلال الأعراض.