كيف بدأ احتلال فلسطين
لو عايز تعرف الحاضر كويس يبقى لازم ترجع للماضي وتشوف أصوله وحقيقته علشان تقدر تعرف ايه الصدق وايه الكذب وكمان علشان تعرف أبعاد القضية كويس خاصة لو قضية مهمة زي القضية الفلسطينية فلازم تكون فاهمها كويس علشان تقدر تحكيها لأولادك وللناس اللي حواليك علشان كده حاولنا نحكيلك ازاي بدأ الاحتلال بشكل بسيط خالص وفيه كل المعلومات اللي محتاج تعرفها من بداية القصة وفقا لوكالة الأنباء الفلسطينية و موقع BBC.
فلسطين مطمع من زمان للاحتلال وده بان من زمان أوي لما ظهرت حركة الإصلاح الديني على إيد “مارتن لوثر” في أوروبا وبدأ أصحاب المذهب البروتستانتي الجديد يروجوا لفكرة أن اليهود هم شعب الله المختار،ولازم يرجعوا لوطنهم المقدس فلسطين وبعدها التاجر الدنماركي “أوليغربولي” عمل خطة سنة 1695م لتوطين اليهود في فلسطين وسلمها لملوك أوروبا في الوقت ده.
وبعدين في عصر “نابليون بونابرت” سنة 1799م استمرت المحاولات لما حاول يغزو مدينة عكا علشان يعمل وطن قومي للجماعات اليهودية المشردة حول العالم ولكن “نابليون” فشل في دخول عكا وقتها.
وزادت حملات المطالبة بمشروع الاستيطان اليهودي في فلسطين في القرن الـ19 وظهرت الحركة الصهيونية كحركة سياسية بشكل عملي في النص التاني من القرن الـ 19 وكان من أبرز نشطائها “لورنس أوليفانت” واللي دعا لضرورة تخليص اليهود من الحضارة الغربية وتوطينهم في فلسطين عشان ينقذوا الدولة العثمانية من مشاكلها الاقتصادية.
وفعلا بدأت الحركة تسيطر على الأراضي الفلسطينية وتم إنشاء أول مستعمرة يهودية في فلسطين على أيد اليهودي البريطاني “مونتفيوري” سنة 1837م، وكان عدد سكانها حوالي 1500 يهودي.
وسنة 1878م مجموعة من اليهود اشتروا 3375 دونما -والدونم يعادل 1000 متر مربع- من أراضى قرية فلسطينية اسمها ملبس على الحافة الجنوبية من نهر العوجا، وتم تسجيلها باسم شخص نمساوي اسمه “سلومون”، واستمرت المحاولات اليهودية للسيطرة على الأراضي الفلسطينية لحد سنة1881م اللي ييعتبرها المؤرخ اليهودي “والترلاكور” بداية التاريخ الرسمي للاستيطان اليهودي في فلسطين بعد ما وصل عددهم 3000 يهودي من أوروبا الشرقية.
وسنة 1882م بدأ المهاجرين الروس ييجوا هم كمان فلسطين رغم إصدار السلطات العثمانية قانون يحد من الهجرة لفلسطين.
وبعدها سنة 1897 “ثيودور هرتزل” نجح في الترويج لفكرة استعمار فلسطين وإقامة وطن لليهود فيها وعمل المنظمة الصهيونية العالمية وكان هدفها تنفيذ البرنامج الصهيوني اللي كان نصه بيقول “هدف الصهيوني هو إقامة وطن قومي لليهود في فلسطين يضمنه القانون العام”.
وموقفش بس عند كده كمان حاول “هرتزل” إنه يقابل السلطان “عبد الحميد الثاني” عشان يستولى على قطعة أرض من فلسطين مقابل امتيازات مادية كبيرة وكمان سياسية لكن السلطان رفض عرضه وبعدها حاول إنه يعمل مستوطنة يهودية في أوغندا علشان يشتت أنظار العالم عن مساعي اليهود في فلسطين، لكن المنظمة الصهيونية رفضت اقتراحه.
ومن وقتها سعت الحركة الصهيونية خلال الربع الأخير من القرن الـ19 إنهم يمتلكوا أكبر مساحة ممكنة من الأراضي لأنها جزء أساسي هيساعدهم على إقامة الدولة اليهودية اللي بيحلموا بيها وساعدهم نظام ملكية الأراضي اللي كان منتشر في فلسطين وقتها إنهم يحققوا مخططاتهم في امتلاك الأراضي الفلسطينية وتحويلها لملكية يهودية.
و سنة 1917م بريطانيا احتلت فلسطين وقت الحرب العالمية الأولى و طردوا العثمانيين منها ووقتها طلع وعد بلفور اللي كان نصه أن “حكومة صاحب الجلالة تنظر بعين العطف إلى إقامة وطن قومي في فلسطين للشعب اليهودي”.
ومن وقتها طبعا بدأ رفض الفلسطينيين للقرار ده وثوراتهم واضراباتهم وفي نفس الوقت زاد عدد اليهود المهاجرين لفلسطين في أواخر القرن الـ19 لحد الحرب العالمية الثانية خاصة الفترة بين العشرينيات والأربعينيات، لهروبهم من بلادهم كلاجئين لفلسطين بسبب الاضطهاد الديني اللي اتعرضوله في أوروبا وكانوا فاكرين إنهم بكده لقوا وطن يضمهم خاصة بعد المحارق الجماعية اللي تعرضوا ليها في ألمانيا من “هتلر” واتسمت بالهولوكوست في الحرب العالمية الثانية.
وزادت حدة المشكلة أكتر لما سنة 1947م صوتت الأمم المتحدة على قرار تقسيم فلسطين لدولتين منفصلتين، واحدة يهودية مساحتها 57.7٪ من أرض فلسطين والتانية عربية والقدس وبيت لحم تحت وصاية دولية. .
وفي سنة 1948م الانتداب البريطاني على فلسطين انتهى و القيادة اليهودية في فلسطين استغلت ده وأعلنت قيام دولة إسرائيل وساعتها قامت حرب فلسطين رفضا للقرار ده وكمان الدول العربية رفضته وشارك في الحرب فلسطين والأردن ومصر والعراق وسوريا ولبنان والسعودية ضد الحركة الصهيونية بس حصلت هزيمة للعرب في الحرب ومن وقتها قامت إسرائيل بـ جرائم غير إنسانية وكمان هجرت السكان الأصليين من الفلسطينيين وصادرت أراضيهم وبيوتهم وممتلكاتهم واتسمت الفترة دي بالنكبة وبعد انتهاء القتال بهدنة كانت إسرائيل سيطرت على معظم المنطقة.
وسنة 1967م احتلت إسرائيل القدس الشرقية والضفة الغربية و معظم مرتفعات الجولان السورية وقطاع غزة وشبه جزيرة سيناء المصرية
وتأسست مستوطنات يهودية في كل الأراضي المحتلة بموافقة الحكومة الإسرائيلية .. مع وجود اللاجئين الفلسطينيين وأحفادهم في غزة والضفة الغربية وتم تهجير بعضهم لدول الجوار زي الأردن وسوريا ولبنان.
وإسرائيل رفضت رجوعهم مرة تانية لبلادهم خوفا من سيطرتهم عليها من تاني وتهديد وجودهم.
ولحد النهاردة إسرائيل محتلة غزة وبتقول إن القدس عاصمتها وكتير من الدول بتدعمها زي أمريكا ولكن لحد النهاردة الفلسطينيين عندهم حلم يرجعوا وطنهم من تاني ولسه بيقاوموا لأخر نفس.
