حكاوي المونديال.. “قصة مهاجم سويسرا وجناح البرازيل”
رغم إن دور المجموعات في كأس العالم 2026 انتهى إلا إن البطولة لسه بتقدم كل يوم حكايات جديدة عن نجوم بيكتبوا أول فصول المجد في مشوارهم الكروي
ومن بين أبرز الأسماء اللي فرضت نفسها على الساحة برز السويسري الشاب “يوهان مانزامبي” بعد عروضه القوية مع منتخب بلاده واللي ساهمت في تصدر سويسرا مجموعتها وسجل 3 أهداف إلى جانب الجناح البرازيلي “رايان” اللي استغل الفرصة وظهر في مباريات البرازيل التلاتة بدور المجموعات ولفت الأنظار بأدائه وثقته الكبيرة رغم صغر سنه ليؤكد إنه واحد من أبرز اكتشافات المونديال حتى الآن ويضع نفسه ضمن قائمة المواهب المرشحة للانفجار على الساحة العالمية
1- “يوهان مانزامبي”.. جوهرة سويسرا الجديدة:
من بين كل المواهب الشابة اللي ظهرت في كأس العالم 2026 كان اسم “يوهان مانزامبي” واحد من أكتر الأسماء اللي لفتت الانتباه.. مهاجم سويسرا صاحب الـ20 سنة قدم نفسه بشكل مميز وأثبت إنه مش مجرد موهبة صاعدة لكنه مشروع نجم كبير قادر يقود خط هجوم المنتخب السويسري لسنين طويلة
قبل المونديال مانزامبي كان بالفعل بيعيش أفضل فترات مسيرته مع فرايبورج الألماني.. النادي المعروف إنه مصنع للمواهب نجح في توهج اللاعب بعد انتقاله من سيرفيت السويسري سنة 2023 وهو عنده 17 سنة فقط.. بدأ مع فريق الرديف في دوري الدرجة الثالثة الألماني وبعدها المدرب “جوليان شوستر” إداله فرصة الظهور الأول في البوندسليجا خلال سبتمبر 2024 وما احتاجش وقت طويل علشان يثبت نفسه
في نهاية موسم 2024-2025 سجل هدفين وصنع هدف خلال ست مباريات متتالية وبعدها واصل التطور في موسم 2025-2026، وسجل أول أهدافه الأوروبية في الدوري الأوروبي أمام نيس الفرنسي.. تألقه مع فرايبورج فتح له باب المنتخب السويسري الأول وهو عنده 19 سنة.. وسجل هدف في مباراته الثانية أمام أمريكا وبعدها أضاف هدف تاني في تصفيات كأس العالم ضد السويد ليؤكد إنه لاعب بيحب الظهور في المواعيد الكبيرة
اللي بيميز مانزامبي إنه لاعب هجوم متكامل. يقدر يدافع ويبني اللعب ويكسر خطوط المنافس بالمراوغة وكمان عنده نزعة هجومية واضحة.. هو نفسه وصف أسلوبه قبل البطولة وقال: “أنا لاعب بوكس تو بوكس في الأساس لكن أقدر ألعب كجناح أو صانع ألعاب.”
كتير من المتابعين شبهوا أسلوبه بأسطورة ألمانيا مايكل بالاك بسبب قوته البدنية وقدرته على التأثير في كل جوانب المباراة.. مدرب سويسرا مراد ياكين كان من أكتر الناس اللي أشادوا بيه وقال: “عنده جوع رهيب لتسجيل الأهداف ودي حاجة نادرة جدًا بالنسبة للاعبي الوسط.”
أما زميله في فرايبورج “فينتشنزو جريفو” فـ قال: “عنده إمكانيات تخليه لاعب عالمي.. بيعرف يعدي المنافسين بطريقة مش أي لاعب يقدر يعملها حتى إدارة فرايبورج أكدت بعد تجديد عقده في صيف 2025 إن النادي هو المكان المثالي لاستمرار تطوره وإن مستواه بيتحسن بشكل مستمر
والغريب إن مانزامبي كان في طفولته عايز يبقى حارس مرمى لكن والده وأخوه أقنعوه يسيب الجوانتي ويلعب في الملعب وقرارهم كان نقطة التحول اللي صنعت واحد من أبرز مواهب الكرة السويسرية حاليًا.
2- “رايان”.. جوهرة البرازيل اللي خرجت من شوارع فاسكو:
لو فيه لاعب برازيلي شاب انفجر نجمه في الفترة الأخيرة فأكيد “رايان” واحد من أبرزهم.. المهاجم صاحب الـ19 سنة دخل كأس العالم 2026 وهو لسه في بداية مشواره لكنه خرج من البطولة باعتباره واحد من أهم المواهب الهجومية اللي خطفت الأنظار
حكاية رايان بدأت من نادي فاسكو دا جاما النادي اللي عاش فيه حرفيًا قبل ما يبقى لاعب كرة.. اتولد في حي باريرا دو فاسكو اللي بيحيط باستاد ساو جانواريو وبدأ رحلته داخل النادي وهو عنده 7 سنين
الكرة كانت جزء من حياته بسبب والده “فالكمار” لاعب فاسكو السابق واللي كان دايمًا بيحلم يشوف ابنه يكمل المشوار.. “رايان” مر بكل منتخبات البرازيل السنية من تحت 15 سنة لحد تحت 20 سنة قبل ما يحقق حلمه الأكبر لما كارلو أنشيلوتي استدعاه لأول مرة للمنتخب الأول
وقال وقتها: “ده حلم طفولتي وحلم عيلتي كلها.. لعبت لكل منتخبات البرازيل السنية وكان نفسي أوصل للمنتخب الأول و حققت الحلم”
واحدة من اللقطات المؤثرة في حياته كانت مع أسطورة فاسكو “روبرتو ديناميت” وهو طفل صغير نصحه الأسطورة قائلاً: “خلي أبوك وأمك دايمًا مرجعك لأنهم أكتر ناس بيحبوا مصلحتك… وأنا نفسي أعيش لحد ما أشوفك بتسجل أهداف لفاسكو”
بعد وفاة “ديناميت” في يناير 2023 بأيام قليلة “رايان” خاض أول مباراة احترافية مع فاسكو وأصبح أصغر لاعب يمثل النادي في القرن الحالي.. الانفجار الحقيقي حصل في موسم 2025 لما سجل 20 هدفًا في كل البطولات وقاد فاسكو لنهائي كأس البرازيل لدرجة إن فيليبي كوتينيو وصفه وقتها بـ”الجوهرة النادرة” وقال: “ولد متواضع جدًا وبيشتغل بكل قوة ومستقبله هيكون كبير”
مدربه “فرناندو دينيز” كان مقتنع إنه لسه ما وصلش لنصف إمكانياته.. وقال: “نسخة بكرة من رايان هتكون أفضل بكتير من النسخة الحالية” بعد الموسم التاريخي ده انتقل لبورنموث الإنجليزي مقابل حوالي 35 مليون يورو واختار النادي لأنه شايفه أفضل محطة للانطلاق في أوروبا
المفاجأة إنه احتاج 3 مباريات فقط علشان يثبت نفسه في الدوري الإنجليزي سجل هدفين وصنع هدف وقدر يلفت الأنظار بسرعته وقوته البدنية وضرباته الرأسية وتحركاته الذكية.. مدرب بورنموث السابق أندوني إيراولا والحالي لليفربول أكد إن اللاعب لسه قدامه مساحة كبيرة للتطور بينما دينيز كان شايف إن انتقاله المبكر فيه مخاطرة لكن البداية القوية في إنجلترا أثبتت إن رايان كان واثق من خطوته.
