دراسة: اللي بيتأخر على مواعيده أذكى وأسعد وبيعيش أطول

لو حد اتأخر عليك أكتر من ربع ساعة بتحس إنك مش قادر تقعد معاه بعد ما يوصل، بس عموما يعني محدش بيحب التأخير حتى اللي بيتأخروا بس بالرغم إن التأخير صفة سيئة وهما عارفين إنها سيئة إلا إن الموضوع مابيكونش بإيدهم.

جامعة “هارفارد” عملت دراسة عن التأخير ولقيت إن التأخير مفيد لصحة الشخص ولقيت الدراسة إن:

1- أقل توتر من باقي الناس:

الأشخاص اللي بيتأخروا الناس بتبصلهم إنهم مش مسؤولين زي باقي الناس، بس الدراسة بتقول إنهم بيعيشوا أكتر، والسبب اللي قاله الدكاترة اللي في كلية الطب بجامعة هارفارد إن الأشخاص اللي بيتأخروا بيبقوا أهدا من اللي بيبقوا عايزين دايما يوصلوا في معادهم.

الأشخاص اللي دايما بيتأخروا مابيسمحوش لنفسهم إن يتضايقوا عشان “Deadline” أو عشان شغل ماخلصش في معاده ونتيجة لده بيبقوا أقل عرضة للتوتر على عكس الأشخاص الملتزمين بمعادهم بيضغطوا على نفسهم عشان يبقوا ملتزمين ونتيجة لده فالأشخاص اللي بيتأخروا فرصتهم أقل في إنهم يعانوا من أمراض زي الإجهاد وارتفاع ضغط الدم وأمراض القلب والأوعية الدموية.

2- الناس المتأخرين أكتر سعادة:

التأخير بيرتبط برضه بالتفاؤل ومستويات أعلى من الحماس، وده لإن الأشخاص اللي بيتأخروا عشان يحلوا موقف ممكن يلغوا معاد مهم عادي زي مثلا معاد تدريب أو معاد مع حد ويقدروا طبعا يوصلوا في معادهم بعد كده لباقي اليوم لإنهم لغوا حاجة، بس بالرغم إن تقديرهم للوقت دايما فيه حاجة غلط، لكن نظرتهم المتفائلة للحياة ليها شوية فوايد مهمة على المدى البعيد.

ووفقا للدراسة فالأشخاص المتفائلين أسعد عموما عشان بيبقى عندهم طريقتهم الخاصة عشان يبصوا للحاجة بإيجابية حتى لو متأخرين، وتبني موقف إيجابي ناحية الحياة عموما بتساعد الشخص على تحسين صحته العامة، وبتسمحله يعيش وقت أطول، لإن التفاؤل بيساعد على تحسين صحة القلب والدورة الدموية.

3- الناس اللي بيتأخروا أذكى:

التأخير علامة على إن الشخص ذكي، وده وفقا لدراسة عملها عالم النفس جيف كونتي إن الأشخاص اللي بيتأخروا بيميلوا إنهم بيعملوا كذا حاجة في نفس الوقت، وده بيتأكد لو واجهوا تحدي، ده غير إن الأشخاص اللي بيتأخروا قادرين إنهم يوصلوا لحلول كويسة بشكل أسرع لإنهم متعودين في التفكير في أقل وقت وبيتزنقوا في الوقت قبل الـ”Deadlines ” وده بيخليهم يبقوا منتجين أكتر من الأشخاص اللي بيوصلوا في مواعدهم.

4- اللي بيتأخروا بيعيشوا أكتر:

عشان نلخص الموضوع ببساطة الأشخاص اللي بيتأخروا هما أقل توتر وسعدا أكتر وأذكيا أكتر، وده بيخليهم أقل عرضة للأمراض المتعلقة بالتوتر وكما يبدو يعني إن الأشخاص اللي بيتأخروا بيعيشوا وقت أطول، عشان كده ماتضايقش لو اتأخر بعد كده وماتضغطش على نفسك يعني عشان توصل في معادك.

في النهاية يغني محدش بيشجع التأخير عشان هو مضر للي حوالين الشخص اللي بيتأخر أكتر منه هو، وعموما برضه هي عادة سيئة لكن كان كويس برضه إنك تعرف إن فيه جانب إيجابي للعادة السيئة دي.