دراسة: 50% من الستات عندهم شخص احتياطي عشان لو علاقاتهم الحالية فشلت
العلاقات نادرا ما بتمشي على رتم واحد، غالبا بتبقى زي ما قال الفنان أحمد عدوية حبة فوق وحبة تحت والحقيقة دي اللي بتخلي ناس كتير بتخاف على نفسها أو إنها تبقى من غير حد يلحقها ويطبطب عليها أو بيخافوا يبقوا لوحدهم وسينجل من الأساس.
فيه دراسة نشرتها جريدة “ديلي ميل” البريطانية بتقول إن نص الستات بيبقى عندهم شخص تاني كـ Backup أو خطة بديلة أو بتحطه في الاعتبار في حالة إن علاقتهم الحالية اتوترت وانفصلوا عن شريكهم، وخصوصا الستات المتجوزة بيكون عندها خطة البديل التاني أكتر مقارنة بالستات اللي في علاقة بس.
وغالبا الشخص اللي بيبقى احتياطي ده بيكون صديق قديم للست وفي أغلب الأوقات كان واضح إن بيبقى عنده مشاعر ناحية الست دي، لكن المرشحين الأكتر في دماغها بيبقوا إكسات سواء كان صاحب قديم أو جوز قديم، أو حتى شخص قابلوه في الجيم.
الدراسة شملت حوالي ألف ست تقريبا وقالوا إن الشخص الاحتياطي اللي في دماغهم ده ممكن يكون عرفوه مثلا من 7 سنين، وفي نفس الوقت 1 من 10 ستات قالوا إن غالبا الشخص الاحتياطي ده بيبقى صرح بمشاعره ليهم قبل كده.
4 ستات من 10 قالوا إنهم بيبقوا عارفين الراجل اللي حاطينه في الخطة الاحتياطية في علاقاتهم الحالية، وفيه نسبة قليلة جدا من الستات اللي في الدراسة قالوا إن مشاعرهم تجاه الشخص اللي في الخطة البديلة بتساوي المشاعر اللي عندهم لشريكهم الحالي، ووفقا للدراسة برضه قالت حوالي 12% من الستات إن عندهم مشاعر أكبر ناحية الشخص الاحتياطي ده أكتر من المشاعر اللي عندهم ناحية شريكهم الحالي.
واعترفت بعض الستات اللي في الدراسة إن شريكهم الحالي عارف خطيتهم البديلة دي، بس مش كلهم تقبلوها بعض الرجالة قبلوا النكت المتعلقة إن يكون عند شريكتهم خطة احتياطية متعلقة بحد تاني وبعضهم ماقبلش وحس بعدم راحة لما سمع حاجة زي دي.
وبعض الستات قالوا إن الشريك الاحتياطي اللي في دماغهم ممكن يبقى صاحب شريكهم الحالي أصلا، بس فيه حاجات ممكن تهدي الراجل اللي بيقرا الدراسة دي وهي إن واحدة من كل 3 ستات قالت إن بتشك لو فيه أي حاجة من اللي بتفكر فيها أو اللي في دماغها ممكن تتحقق أو تحصل أساسا، بس نسبة قليلة جدا قالت إن الخطة دي ممكن تحصل.
وقال المتحدث باسم شركة OnePoll.com ،وهي الشركة اللي عملت الدراسة، لـ”ديلي ميل” إن وجود خطط بديلة في دماغ 50% من الستات لعلاقتهم الحالية هي علامة مقلقة، عشان كده يا ريت الرجالة تاخد بالها من علاقتها بشريكتها لإن كمان مواقع التواصل الاجتماعي سهلت وصول الناس لبعض خصوصا لو كان “إكس”.
