في اليوم العالمي للبحيرة.. اعرف يعني إيه البحيرات المسحورة وإيه أماكنها في مصر؟

كل ما تمشي في شوارع مصر ومحافظتها تلاقي حاجة تبهرك ما هي بلد الـ 7000 سنة حضارة بقى.. وماتزهقش منها لأن كل ما تفتكر إنك روحت أماكن كتير فيها تتفاجأ إن فيها حاجات أكتر ماتعرفش عنها حاجة.. زي البحيرات المسحورة اللي هنحكيلك عنها

إيه البحيرات المسحورة؟ واتسمت كده ليه؟

البحيرة المسحورة لقب بيوصف مجموعة من البحيرات الموجودة في مصر اللي ليها خصائص مميزة ومناظر طبيعية جميلة.. واتسمت كده عشان كام سبب زي إن ألوانها بتتغير على مدار اليوم وحسب انعكاس آشعة الشمس عليها.. ده غير موقعها المميز الموجود وسط الصحراء بين الكثبان الرملية والجبال فده بيخلي شكلها مميز وساحر فعلًا وسط المشهد الصحراوي 

البحيرات المسحورة في مصر

بحيرة الفيوم 

الموجودة في محمية وادي الريان.. البحيرة دي بيتغير لونها كل ساعة حسب انعكاس الشمس عليها من بداية الشروق لحد الغروب.. فمثلًا ساعات تلاقي لونها قرمزي وساعات تانية أزرق وساعات أزرق مخضر.. ومش بس تغيير اللون هو السبب في تسميتها بالمسحورة لكن كمان مكانها وسط المنحدرات الصحراوية

بحيرة محمية رأس محمد

البحيرة موجودة في جنوب سيناء تحديدًا على بعد 12 كم من شرم الشيخ.. اتسمت بالمسحورة عشان لون مياهها بيتغير 7 مرات في اليوم عشان فيها معادن معينة ومكونات طبيعية ببتفاعل مع الشمس.. فلما ضوء الشمس بيتحرك عليها بيعكس الألوان الموجودة في قاعها بسبب النباتات والصخور الملونة اللي فيها

بحيرة الملك فاروق

البحيرة موجودة في دهشور والمميز في سحرها مش اللون على قد فكرة المساحة.. البحيرة دي بتزيد مساحتها كل سنة في نهاية شهر سبتمبر وبترجع تنحسر تاني وتقل في شهر فبراير ومارس

بحيرة محمية جالوم

سحر البحيرة دي المرة دي مش في اللون ولا المساحة ولكن في الطبيعة الجبلية وموقعها المنعزل.. فالبحيرة موجودة في مكان منعزل في دهب ماتعرفش تروحه غير باللانش أو الجمل.. وفي المكان نباتات وأعشاب نادرة مش موجودة غير هناك.. ففعلًا هتتسحر بهدوء المكان اللي هيريح أعصابك ويغسل همومك

وفي الآخر الأماكن دي كلها تقدر تعمل فيها سفاري وتتزحلق على الكثبان الرملية هناك وتعمل ذكريات مع صحابك فيها