فراق مسلسلك المفضل أصعب من الحبيب.. طب إزاي تعمل موف أون؟

عارف إحساس الخنقة اللي بيجيلك وانت في آخر حلقتين من مسلسل متابعه أو كتاب بتقرأه ومش بتكون عارف هتعمل إيه بعد مايخلص؟.. حابين نقولك أولا انت مش لوحدك.. وثانيا بقى فالحالة دي اسمها “Post-Series Depression Syndrome” أو اكتئاب ما بعد المسلسل.. فتعالى نعرف إيه سبب ونتعامل إزاي

إيه السبب؟

1- حسب “كيفن فوس” مؤسس مركز كاليفورنيا لعلاج الوسواس القهري والقلق.. إن الحزن بيحصل بسبب إننا بنرتبط بالقصة والأحداث والشخصيات اللي بنتفرج عليها.

2- الخلايا العصبية المرآتية: لما بنتفرج على حاجة بتنشط جوه دماغنا الخلايا دي وبنتوحد مع الشخصيات وبنحس بنفس مشاعرهم يعني لو شخصية متوترة هنتوتر معاها ولو قصة رومانسية هنتأثر ونحس كأننا عايشين جواها وده بيخلينا نحارب إحساسنا بالوحدة أو نهرب من الواقع الممل اللي عايشينه.

3- إحساس الفراغ بعد النهاية: عالمة النفس جانيت ريموند بترجع السبب ده لاستهلاك كمية كبيرة من رصيد مشاعرنا وقت الفرجة من خلال تجربة عميقة لمست كل مشاعرك ونقاط ضعفك.. ولما  خلصت كأنها أخدت معاها جزء منك وطاقتك.. وبمعنى تاني فهي بتسبب “فراغ عاطفي”.

طب نموف أون إزاي من “اكتئاب مابعد المسلسل”؟

1- أول حاجة لازم تتأكد إن ده إحساس طبيعي.. ماتقلق منه هتتعافى منه تدريجي.

2- لو عايز تعالج الإحساس ده بسرعة.. حاول تكتب عنه ريفيو مثلا أو تقول رأيك فيه مع حد شافه زيك.. لأن ده ممكن يخرج مشاعرك المكبوتة منه.

3- وطبعا مش محتاجين نقولك حاول تشغل وقتك في الفترة دي بأنك تعمل حاجات بتحبها تنزل مع صحابك تقعد مع حد بتحبه او حتى تلعب لعبة بتحبها عشان تخفف شوية إحساس الفراغ العاطفي.