ليه بنضرب لخمة قدام الشخص اللي معجبين بيه؟
عمرك عطلت وضربت لخمة وبدأت تتهته وبقيت غبي ومش عارف لا تصد ولا ترد قدام شخص إنت معجب بيه، ما تقولش لأ عشان كلنا بيحصل معانا كده.. فاطمن إنت مش لوحدك
طبقًا لكلام الدكتور النفسي الأمريكي “مارني فورمان”
فإن لما الواحد بيكون حوالين شخص هو معجب بيه، الجسم بيفرز هرمونات بيبقى تأثيرها على المخ فيها شبه من تأثير المخدرات وده اللي بيسبب بطء الاستيعاب وأحيانًا الغباء وقلة التركيز والتصرفات الغريبة
بس بيرجع “مارني” يطمننا ويقول إن ده عادة بيكون أكتر في بداية العلاقة وإنه بيقل بالتدريج لما بتتعود على الشخص ده وبتبدأ ترجع لحالتك الطبيعية لأنك ساعتها بتبقى حاسس بأمان واستقرار أكتر في العلاقة، وكمان في عامل تاني بيأثر وهو خبراتك أو علاقاتك السابقة، يعني كل ما كان ليك خبرات وعلاقات سابقة أكتر كل ما هتقل فرصة إن يحصلك كده لأنك هتبقى متعود بشكل ما
في ناس كمان بيحصلها كده لما بتتعرف على أي شخص جديد عمومًا، بس بيكون بنسبة أقل من اللي بيحصل في العلاقات العاطفية، وبينصح الناس دي إنها تحاول تشترك في أنشطة اجتماعية كتير عشان تكسر حدة الرهبة والتوتر ده
هنقولك خمس نصايح عشان تحاول تتجنب أو تقلل من “العطلة” اللي بتحصلك قدام شخص إنت معجب بيه
1-اهتم بشكلك الخارجي ولبسك
ده هيحسسك بثقة أكتر وهيقلل من مشاعر التوتر والقلق وهيخليك حاسس براحة أكبر وإنت بتتعامل
2- نام كويس
اعتبر نفسك رايح امتحان أو انترفيو، ونام كويس قبلها عشان متبقاش عطلة من الحب وعطلة من قلة النوم والتركيز كمان.. متفضحناش
3- خليك نفسك
كلنا فينا عيوب وحاجات فاكرين إن محدش هيتقبلها أو هيحبها، بس الحقيقة إن الشخص اللي هيحبك هيقبلك بكل اللي فيك، وأوب طريقة عشان تكتشف إذا كان اللي قدامك بيحبك وإنت كمان بتحبه ولا لأ إنك تتصرف على طبيعتك وتشوف هيتعامل معاك إزاي
4- اللي عدى عدى عدى عدى ” جملة يمكن سماعها بصوت عمرو دياب”
يعني ماتقفش عالواحدة، لو عملت أي حركة غبية أو محرجة اقلبها هزار وضحك وعديها إنت مش في اجتماع مجلس الأمن، لأنك لو وقفت عند كل حلجة هتتوتر أكتر والدنيا هتبوظ
5- خد رأي حد بتثق فيه
دايمًا احكي لشخص بتثق فيه وفي نفس الوقت عارفك كويس، عشان هيقدر يقولك لو ده طبيعي أو إنك متوتر زيادة عن اللزوم هيبقى زي مرايتك لحد ما الفترة دي تخلص وتعدي
بص إنت هتعمل اللي عليك وتنفذ النصايح دي، ويعني بالنسبة للنتيجة “نسأل الله التساهيل”!
