معاناة أصحاب الشخص العصبي

تقريبًا كل شلة وكل فرد أخد نصيبه من إنه يبقى عنده صديق عصبي زيادة عن اللزوم، ودي في حد ذاتها بتخلق عندك معاناة طول الوقت وبتمثل في النهاية تجربة في حياتك تستحق الوقوف قدامها وده لشوية أسباب هنقول حاجات منهم على سبيل المثال وليس الحصر:

1- غضبه السريع بيخليكوا معرضين طول الوقت للكلاشات والمواقف بينكوا، وده بيخليك تتعلم إنك تستحمل وتسامحه بعد ما يهدى، وده شيء مرهق لأي حد لكن له جانب كويس إنه بيصنع صداقة قوية لأن بيبقى معناه إنك عرفت الشخص ده كويس.

2- هو أكيد مش معاك انت بس كده لكن كمان مع الناس فمشاكله كتير وعداواته كتير وده بيحط في موقف دايمًا إنك تختار جنب تدافع عنه أو تتخانق معاه، أو تختار تبعد وتطلع برة الموضوعات خالص.

3- من قبل مرحلة الاختيارات فيه مرحلة تانية كتير بتتحط فيها إجبار، وهي إنك تبقى معاه ويعمل مشكلة عشان حد خبط فيه ولا كسر عليه وهو سايق.. حياة كلها تشويق ومغامرات.

4- طول الوقت مضطر “تحلق عليه” أو تبعده عن اللي هيخلي أعصابه تفلت لو عايز القعدة/الطلعة/ المشوار يعدي على خير.

5- بيربي عندك خوف غير مبرر من ردود أفعاله، خصوصًا لو كنت بتحبه ومش عايز تختار إنك تتجنبه، لكن حتى في الحاجات العبيطة أو اللي بتنتهي بهزار بتبقى خايف منه.

6- في الغالب الشخص العصبي أوي بيبقى قلبه طيب زيادة عن العادي.. فاللي هو انت جننتنا معاك ياعم انت!

7- الصوت العالي! لو انت من اللي بيتوتروا بسرعة من الصوت العالي والطاقة الزايدة حياتك بتبقى ملاهي خالص.

في النهاية المعاناة بتطلع من إنه صاحبك وانت مش هتتخلى عنه والأصول بتقول خد صاحبك على عيبه، فاحنا بنفضفض بس عشان نقدر نستمر.