موضوع مايهمكش: ليه بنحب ريحة المخبوزات؟
أكيد دخلت سوبر ماركت كبير وفضلت ماشي ورا الريحة الحلوة اللي طالعة من الفرن وماقدرتش تمسك نفسك وفضلت تشتري مخبوزات حتى وأنت مش جعان أو عديت من قدام فرن وهو لسه مطلع الباتيه اللي بالجبنة واشتريتلك كام واحدة وأنت مش جعان لمجرد بس إن ريحتهم شدتك وعجبتك.
تقريبًا مافيش حد ريحة المخبوزات مابتفتحش نفسه حتى لو كان عيش بس، وحتى لو مابتفتحش نفسه فهو أكيد بيحبها خصوصا لو الريحة دي طالعة من فرن البيت ولإن الإحساس ده موجود عند ناس كتير.. دورنا إيه ممكن يبقى سبب حب الناس لريحة المخبوزات ولقينا موقع “irishtimes” بيقول إن وفقا لمجموعة من علماء غذاء ايرلنديين في كلية “دبلن” إنها دي الريحة المحببة عالميًا تقريبًا لإنها ريحة مرتبطة بالذكريات ولما الشخص بيشمها اللاواعي عنده بيروح لمناطق محددة جدا في طفولته.
ومن خلال مزج التحليل العلمي وبحث كتير على مجموعة من الناس ركزت دكتورة “أماليا سكانيل” والباحثين اللي معاها على اللي بيحبه الناس من الريحة المميزة في ريحة الخبز، واكتشفوا إن فيه أكتر من 540 مركب متطاير مميز في رغيف العيش المخبوز صح وحوالي 20 مركب كمان بيساهموا في إن ريحته تبقى كده.
وبالتالي المركبات دي هي اللي بتخلق الريحة الرئيسية، ومن المتوقع إن بعض المركبات دي زي اللبن والزبدة هما اللي بيخلقوا الروايح دي، لكن الباحثيين قالوا كمان على بعض الروايح المتفق عليها عالميًا زي المكرونة الاسباجيتي المطبوخة والزيتون الأخضر والجريب فروت.
أما موقع “modernist cuisine” قال إن السبب في حب ريحة الخبز هو سبب كيميائي أكتر من كونه سبب نفسي، والدليل على كده هو لو فكرنا هنلاقي إن منتجات القمح مالهاش ريحة لما بنشمها زي مكرونة القمح مابيكونش ليها ريحة لما تتسلق والريحة الحلوة اللي بتطلع من اللازنيا بتبقى بسبب الصلصة والجبنة واللحمة مش المكرونة، ومعظم البسكوت اللي مابيكونش فيه خميرة ريحته مابتشدش أوي، لكن المخبوزات المخمرة كيميائيا زي البسكوت والكحك والمخبوزات اللي فيهم خميرة وبيكينج صودا ريحتهم بتبقى مغرية وده بيحصل بالذات أول ما تدخل الفرن ويبدأ لونها يتحول للون البني.
وده لإن تغيير اللون بيدل على حدوث تفاعلات كيميائية بتتحد فيها السكريات مع الأحماض الأمينية عشان تكون مجمعات ذهبية وأمبيرية وأثناء ما المخبوزات بتستوي فيه مركبات عطرية كتير بتبدأ تطفو في الهوا بتاع المطبخ وبتروح على مناخيرك.
خلايا الخميرة بتنتج مواد كيميائية بتتحلل أثناء عملية الخبز لمواد عطرية ريحتها حلوة أوي وكل ما زادت مدة التخمير، كل ما بقى ريحة الخميرة واضحة أكتر لأن الميكروبات بيبقى عندها وقت أكتر لإنتاج المركبات دي.
ولما جربوا يخبزوا نفس الوصفة بخميرة مرة ومن غير خميرة مرة تانية، لقوا إن الخميرة بتدي طعم معقد أكتر، وكانت ريحة المخبوزات اللي معمولة بخميرة أحلى من اللي بدون خميرة، عشان كده لما تخبز المرة الجاية وتلاقي ريحة بيتك أو مطبخك زي ريحة الجنة كده اعرف إن سبب الريحة دي هي ريحة الخميرة والفضل يرجعلها لما بتشتري حاجات من الفرن وأنت معدي من قدامه وهي السبب في تخنك.
