موضوع مايهمكش: 18 معلومة ماكنتش تعرفها عن الكاكاو

بنستني الجو يسقع من السنة للسنة عشان شوية المشروبات اللي بنتدفى بيها يعني شوية سحلب أو حمص شام أو هوت شوكليت أو زي ما كنا بنقول عليها طول عمرنا كاكاو سخن.

الهوت شوكليت والشيكولاتة والكاكاو هما الراعي الرسمي للشتاء في أي بيت أو قهوة، فقولنا ماينفعش نسيبك تشربهم بمزاج كده من غير ما نبقى بنقولك شوية معلومات وحقايق تفتكرها وأنت بتشرب أو بتاكل أي حاجة فيها كاكاو زي ما قال موقع “lake champlain chocolates” في مقال عن الكاكاو:

1- الأسم العلمي لشجرة الكاكاو هو “Theobroma” ومعناها طعام الآلهة.

2- الكاكاو بينمو في حدود 20 درجة من خط الاستواء على ارتفاعات منخفضة، وبيتغذى على الرطوبة والحرارة والضل طول السنة.

3- شجرة الكاكاو بتنتج محصول طول السنة بالرغم إن فيه محصولين في السنة، والثمرة بتنمو بشكل مباشر من جذع أو أطراف شجرة الكاكاو.

4- ثمرة الكاكاو لما بتنضج بتتحول للون البرتقاني أو الأصفر أو الأحمر.

5- محصول الكاكاو بيكون صغير وبيحتاج لكثافة عمال كبيرة وده بيرجع لإن لحد دلوقتي لسه ماتمش اختراع آلة لحصاده فكل حاجة بتتم بشكل يدوي.

6- مسقط رأس الكاكاو في أمريكا الجنوبية خصوصا في حوض الأمازون وانتشر الكاكاو بعد كده في شرق، نفس فكرة القهوة بس بالعكس لما ظهرت في إفريقيا خصوصا إثيوبيا بعد كده انتشرت في الغرب.

7- شجرة الكاكاو متغطية بالزهور اللي بيتم تلقحيها عن طريق دبانة صغيرة جدا بدل النحل.

8- حبة الكاكاو هي بذرة بتنمو داخل جراب الفاكهة، وبيكون جوا الثمرة الواحدة بين 30 لـ 50 بذرة وكل واحدة فيهم بتبقى قد الزيتونة، والبذور جواها لب.

9- بدأ البشر يستخدموا الكاكاو كغذاء من أكتر من 3000 سنة.

10- حبوب الكاكاو الأول بيتم تخميرها بعد كده بتتجفف وبعد كده بتتحمص، عشان كده الناس بتعتقد إن الشوكولاتة بتليق مع الأكلات المخمرة زي الجبنة والخمور.

11- بيتم فصل الجزء الداخلي من الحبة عن الغلاف الخارجي وده بيبقى بعد التحميص، وبيتطحن وبيتحول لعجينة.

12- الخليط المعجون ده بيتسمي في أوروبا “cocoa mass” أما في أمريكا بيقولوا عليه ” cocoa liquor.

13- عشان يتم إنتاج مسحوق الكاكاو أو زبدة الكاكاو بيتم وضع سائل الكاكاو تحت ضغط مرتفع جدا، لكن عشان يتم تصنيع الشوكولاتة ببتم طحن الكاكاو ببطء وإضافة السكر وزبدة الكاكاو.

14- زبدة الكاكاو مابتحتويش على منتجات ألبان لكن فيها دهون نباتية وموجودة بشكل طبيعي أصلا في الكاكاو.

15- عشان تزرع شجرة كاكاو وتبدأ تنتج محصول الموضوع بياخد وقت تقريبًا 5 سنين.

16- إندونيسيا هي تالت أكبر دولة منتجة للكاكاو في العالم، لكن كتير من مزارعيها ماداقوش الشوكولاتة أبدًا لإن عادة ما بيتم تصدير البذور قبل تخميرهم لاستخدامها في الصناعة  زي صناعة مستحضرات التجميل.

17- بسبب ظروف تغيير المناخ في 2015 ارتفع السعر العالمي للكاكاو للسنة الرابعة على التوالي.

18- أكتر من 90٪ من تاريخ الكاكاو الطويل كان مجرد مشروب بس ومالوش أي علاقة بالسكر، بس في سنة 1590 بعد 5 سنين من وصول الشحنة الأولى من الكاكاو لأوروبا ضاف “فرانسيسكو خوان دي زوماراجا” السكر إلى وصفة المشروب، وبعدها غير تاريخ الشوكولاتة إلى الأبد.

Related Articles

Back to top button