موضوع مايهمكش: 8 حقايق ماتعرفهاش عن الفاصوليا

يوم 6 يناير هو يوم الفاصوليا في أمريكا، وبالمناسبة دي خلينا نعرف شوية معلومات وحقايق متعرفهاش عن الفاصوليا حسب ما قالت مواقع “RandallBeans” و “Express” و “BossKitchen”:

1- أطول شجرة فاصوليا في العالم وصل ارتفاعها أكتر من 14 متر في أمريكا ودخلت موسوعة جينيس للأرقام القياسية، وده نفس الطول تقريبا لـ 3 زرافات كاملين.

2- في اليونان القديمة، كان فيه بعض المسؤولين الحكوميين بيتم انتخابهم عن طريق الفاصوليا. كان عندهم آلة إسمها آلة الفاصوليا، وكانوا مثلا بيحطوا 100 حباية فاصوليا (99 سودة وفاصوليا واحدة بيضاء) والمرشح اللي بتطلعله الفاصوليا البيضاء كان بيتم اختياره.

3- 100 جرام من الفاصوليا فيها حوالي نص الألياف اللي ممكن يحتاجها يوميا الشخص البالغ

4- الفاصوليا واحدة من الأكلات المهمة للأشخاص النباتيين علشان تعتبر من أكتر النباتات اللي فيها بروتين واللي بيعوضوا بيها عدم أكلهم للحمة.

5- نابوليون بونابرت لما عرف إن الفاصوليا بتساعد على تقوية العضلات وتحسين نشاط الدماغ، أمر بأن يتم إدراج الفاصوليا في النظام الغذائي للجيش

6- يٌقال إن البشر بدأوا يزرعوا الفاصوليا من حوالي 5000 لـ 7000 سنة

7- في مصر القديمة، كان بيتم استخدام الفاصوليا والفول في صناعة مستحضرات التجميل عشان تبييض الوجه

8- فيه حوالي 200 نوع مختلف من الفاصوليا حول العالم دلوقتي.