التفسير ورا حرائق تونس والجزائر وفرنسا وغيرهم من دول حوض البحر المتوسط

في أسابيع قليلة حرائق الغابات التهمت مئات الآلاف من الأفدنة في دول حوض البحر المتوسط وأجبرت مئات الآلاف من الناس على إخلاء بيوتهم واتسببت في وقوع ضحايا من المدنيين ورجال الإطفاء.. في إسبانيا بس اتحرق من بداية الموسم أكتر من 357 ألف فدان وفرنسا اتحرق فيها حوالي 100 ألف فدان وإجلاء أكتر من 250 ألف شخص

إحنا متعودين لما نشوف الأخبار دي نقول: أكيد الحر هو السبب.. لكن الحقيقة أعقد من كده بكتير

اللي بيحصل دلوقتي في الجزائر وتونس وفرنسا وإسبانيا وإيطاليا واليونان مش مجرد “صيف حر”.. دي سلسلة أحداث بدأت قبل الصيف بشهور

طب إزاي ده بيحصل؟

لو عندك كمية كبيرة من الحطب وسيبتها في الشمس لحد ما نشفت هل هيبقى محتاج أكتر من شرارة صغيرة عشان تولع؟

الإجابة لا.. هي الغابات بتشتغل بنفس المنطق تقريبًا

في الشتاء والربيع.. مناطق كتير من البحر المتوسط حصل عليها أمطار كويسة وده خلّى الأعشاب والنباتات تنمو بشكل كبير وقتها محدش كان شايف إن دي مشكلة بالعكس المنظر كان أخضر وجميل بس بعدها دخل الصيف

درجات حرارة عدت الأربعين.. رطوبة منخفضة ورياح قوية وفجأة كل النباتات اللي كانت علامة على موسم مطير اتحولت لوقود

وده يفسر ليه العلماء بقوا يقولوا إن المشكلة مش في الحرارة لوحدها لكن في تسلسل الأحداث.. لأن الطبيعة أحيانًا مابتمشيش بمنطقنا الحاجة اللي كانت مفيدة من كام شهر ممكن تبقى أخطر حاجة بعد كده

ناس كتير بتتصور إن معظم حرائق الغابات سببها البرق

وده منطقي يعني الطبيعة هي اللي ولعت الطبيعة.. لكن الإحصائيات الأوروبية بتقول حاجة مختلفة تمامًا وهي إن أغلب حرائق الغابات أصلها إنسان

سيجارة مرمية من شباك عربية.. نار شواء اتسابت من غير ما تطفي.. حرق مخلفات زراعية.. شرارة من خط كهربا أو حتى حرايق متعمدة.. يعني في أغلب الأحيان النار ما بتبدأش من الطبيعة لكنها بتستغل الظروف اللي الطبيعة وفرتها وده يخلينا نفرق بين حاجتين بنخلط بينهم طول الوقت

سبب بداية الحريق وسبب تحوله لكارثة

الشرارة ممكن تكون صغيرة جدًا.. لكن اللي يخليها تلتهم آلاف الهكتارات هو الجو.. تخيل إنك بتنفس على جمرة صغيرة.. هي كانت موجودة قبل كده لكن النفس اللي خرج منك هو اللي خلاها تتحول لنار

تغير المناخ بيلعب دور مشابه

العلماء مش بيقولوا إنه بيولع الغابات.. لكن بيقولوا إنه بيخلي أي حريق مهما كان سببه أكبر وأسرع وأصعب في السيطرة.. وعشان كده مواسم الحرائق بقت مختلفة عن زمان مش لأنها ظهرت لأول مرة.. حرائق الغابات موجودة في البحر المتوسط من مئات السنين

لكن الجديد إن موسم الحرائق بقى أطول وموجات الحر بقت أشد وعدد الأيام اللي الظروف فيها مثالية لاشتعال النار بقى أكبر

وده السبب اللي خلاك تشوف في نفس الأسبوع تقريبًا أخبار حرائق من الجزائر وتونس وفرنسا وإسبانيا وإيطاليا واليونان.. مش لأن العالم كله قرر يولع في نفس اللحظة لكن لأن كل المناطق دي كانت بتعيش تقريبًا نفس المعادلة المناخية وأحيانًا كل اللي يفصل بين غابة هادية وكارثة تتصدر نشرات الأخبار شرارة بحجم طرف سيجارة