كل اللي محتاج تعرفه عن خدمة “ستارلينك” اللي قدمها إيلون ماسك لأوكرانيا مجانًا

امبارح طلب وزير المعلوماتية في أوكرانيا ميخائيل فيودوروف، عن طريق تويت في موقع تويتر من الملياردير الأميركي إيلون ماسك، تزويد أوكرانيا بمحطات “ستارلينك”، ووافق إيلون ماسك على طلبه على طول ونفذله الطلب، وأعلن مؤسس شركة “سبيس إكس” الفضائية إطلاقه لخدمة “ستارلينك” للاتصالات عن طريق الأقمار الصناعية على الأراضي الأوكرانية، وتوفير خدمة الاتصال القمري للإنترنت.

لو متابع التكنولوجيا ممكن تبقى سمعت عن خدمة “ستارلينك” اللي قدمها إيلون ماسك لأوكرانيا مجانًا بس لو مش متابع فخلينا نقولك إيه هي الخدمة دي زي ما قال موقع “aitnews” في آحد مقالاته:

من البداية كده شركة SpaceX التابعة لإيلون ماسك أطلقت في مايو 2019  صاروخ من طراز Falcon بحمولة غير عادية وهي عبارة عن 60 قمر صناعي، ودي كانت الخطوة الأولى لإطلاق حوالي 12 ألف قمر صناعي خلال السنين اللي جاية، وهدفه هو تقديم خدمة إنترنت جديدة من نوعها، والخدمة دي هتتيح فكرة الاتصال الفضائي بالإنترنت لكل منطقة في الأرض، وخصوصا الأماكن اللي مابيوصلهاش خدمة الإنترنت، أو اللي خدمة الإنترنت فيها سيئة، وهتقدم خدمة لحوالي 3.5 مليار شخص على الكوكب، ماعندهمش خدمة إنترنت مستقرة ولا سريعة.

الجديد في المشروع ده هو إنه هيغطي الكرة الأرضية باتصال بجودة أعلى من الاتصال الفضائي التقليدي، وده هيكون بالاعتماد على أجهزة استقبال حجمها أصغر وتكلفتها أقل، والسبب هو إن أقمار Starlink الصناعية هتبقى بتحلق في مدارات منخفضة فوق الأرض، وده معناه إن الإشارات هتوصل بقوة أعلى لمساحات أكتر بالمقارنةً باللي يبيغطيها أقمار الاتصالات التقليدية، ده غير كمان وقت الاستجابة هيقل بشكل كبير، واستهلاك الطاقة في أجهزة الاستقبال برضه هيقل.

فهتطلق شركة Space X آلاف الأقمار الصناعية عشان تغطي الكرة الأرضية، وممكن الكرة الأرضية يتم تغطيتها بعدد قليل من الأقمار الصناعية الموجودة على مدارات عالية (حوالي 36000 كيلومتر، زي ما هو موجود في التقنية التقليدية)، واسمها بالمحطات الثابتة، لكن وجود القمر الصناعي على ارتفاع معين بيخليه يدور بسرعة دوران الأرض نفسها، (فبيبان لنا ثابت من الأرض) لكن ده معناه إشارة جودتها أقل وتأخير كبير، لكن أقمار Starlink الصناعية هتحلق في  مجموعتين على مدارات منخفضة، بداية من 4400 قمر صناعي، على ارتفاع بين 550 لـ 1300 كيلومتر، والمجموعة التانية بتتكون من حوالي 7500 قمر صناعي، بيحلقوا على ارتفاع بين 335 لـ 346 كيلومتر.

إيه هي فوايد خدمة “ستارلينك”:

1- سرعة اتصال عالية: Starlink بتقدم سرعات اتصال تتجاوز أعلى سرعات الاتصال المتوفرة حاليًا، والسبب هو إن الأقمار الصناعية بتنقل المعلومات بين بعضها عن طريق الليزر، لإن الضوء بيتنقل في الفراغ أسرع من انتقاله في أي وسط تاني (زي الإزاز اللي بيتم استخدامه في كابلات الألياف الضوئية اللي بيتم استخدامه حاليًا).

2- تحسين سرعة الاتصال في شبكات المحمول الحالية: خدمة Starlink مش هتكون خاصة بس على المشتركين فيها بشكل مباشر، هيقدر يستفيد بيها برضه شركات المحمول عشان تسد الثغرات الموجودة في خدمات الإنترنت.

3- توفير خدمة اتصال سريعة ورخيصة في الأماكن النائية والمعزولة: توفير خدمة إنترنت كويسة بيتطلب إإن يبقى فيه بنية تحتية للاتصالات تكلفتها عالية، وده مش متوفر فيكل مكان. لكن Starlink بتسمح يكون أبراج اتصال متركبة بتكلفة قليلة عادي وده لإنها مش محتاجة أي تمديدات أرضية، خصوصا إن الأبراج دي هتستقبل خدمة Starlink عبر الفضاء بعد كده هتوزعها على المشتركين.

وتم إطلاق خدمة الإنترنت القياسية Starlink في أكتوبر 2020 ، وبتكون عن طريق مطالبة العملاء بدفع وديعة بقيمة 99 دولار، و 499 دولار للأجهزة اللي من ضمنها بيكون طبق الاستقبال ، ورسوم خدمة شهرية بقيمة 99 دولار لسرعات تنزيل بتوصل لـ 200 ميجابت فى الثانية، ده غير شركة Space X مقررة إنهم هتطلاق Starlink Premium في النص الأول من السنة دي، وبتقدم سرعات أعلى بتوصل لـ 500 ميجابت في الثانية ، لكن العملا وقتها بيدفعوا وديعة قابلة للاسترداد قيمتها 500 دولار ده بالإضافة لـ 2500 دولار للأجهزة ، ورسوم شهرية بقيمة 500 دولار.