اعرف ليه بتتعصب بسرعة في رمضان!

كتبت: ندى خالد

رمضان شهر الخير والهدوء ولكنه مابيخلاش برضه من الخناقات طول اليوم سواء فى الشغل مع زمايلك أو الخناقات البسيطة مع عيلتك قبل الفطار.

علشان كده دورنا وجمعنالكم فى المقالة دي 5 أسباب بتخلينا متعصبين وخلقنا ضيق فى رمضان وفقا لموقع Altibbi:

1- نقص المياه فى الجسم:

المياه بتمثل 75% من تكوين الدماغ وليها دور كبير فى إن الدماغ تشتغل وطبعا نقص المياه خلال الصيام بيعمل اضطراب فى وظايف الخلايا الدماغية فبالتالي الدماغ بتحاول تعوض ده بإنها تفرز مواد تخليها تعوض المياه اللي فقدتها فبالتالي العصبية بتزيد والتوتر وكمان التركيز بيقل بسبب المواد دي.

شوفت يعنى أنت طلعت غلبان وملكش ذنب! فى حاجة!

2- نقص الجلوكوز فى الدم:

الجسم بيستمد الطاقة اللي بتخليه نشيط وقادر يعمل مهامه اليومية من الجلوكوز فبالتالي أى نقص فى مستوى الجلوكوز بيأثر تلقائي على الدماغ لأنها مبتلاقيش نسيج تاني يعوضها بالطاقة اللي محتاجاها وطبعا ده بيخلينا متعصبين خالص. 

3- نقص الكافيين فى الجسم:

الكلام ده موجه مخصوص لمدمني القهوة والشاي ايوه الكلام ليكم!

طبعا حضرتك متعود كل يوم تشرب خمسة قهوة وسبعة شاي وفجأة من غير أى انذار تبطل فجأة فالجسم مبيبقاش فاهم في
ايه!

 

وبيبدأ الجسم يفقد الكافيين اللي متعود عليه كل يوم فبيعمل رد فعل علشان يعرفك إن فى حاجة غلط  عن طريق إنه بيزود حالة
التوتر والعصبية علشان تحس إن فى مشكلة وتديله الكافيين اللي محتاجه.

4-السهر وقلة عدد ساعات النوم:

ماما طلع عندها حق لما كانت بتقولك بلاش سهر ونام بدري علشان فعلا لما بنسهر ومبنامش الوقت اللي الجسم محتاجه ده بيأثر على الجسم وبيكون مرهق جدا وبالتالي بيأثر على المزاج وحالتك النفسية وبيخليك عصبي ومتوتر طول اليوم ومش طايق حد قدامك.

Tom and Jerry - coffee - Coub - The Biggest Video Meme Platform

5- التوقف المفاجئ عن التدخين:

والكلام ده للمدخنين بس لو أنت مش مدخن يبقى أنت كده فى الأمان 

الدراسات أثبتت إن النسبة الأعلى من اللي بيعانوا من العصبية فى شهر رمضان هما فى الأساس أشخاص مدخنين ولما بنبطل تدخين والنيكوتين بيقل فى الجسم بيحصل للجسم حاجة شبه أعراض الانسحاب اللي بتحصل للمدمنين لما بيحاولوا يبطلوا أى نوع مخدر ومن ضمن الأعراض دي الإكتئاب، التوتر، القلق والعصبية الشديدة ..شوفت أخرة السجاير ايه!

حاولوا بقى تناموا كويس وتقللوا نيكوتين وكافيين وتشربوا مياه على قد ما تقدروا وتاكلوا أكل صحي طول الشهر الكريم لأن احنا كلنا تعبانين ومش ناقصين عصبية.

Related Articles

Back to top button