الحبس لجد 3 سنوات وسنة لأم وسنتين لدكتور بسبب قضايا الختان في أسوان 

حكمت محكمة جنايات أسوان يوم السبت 19 فبراير 2022 بحبس “محمد.ع.ح” عمره ٥٥ سنة، المقيم في قرية المنصورية التابعة لمركز دراو والحكم صدر بـ 3 سنين غيابي، وده بسبب إنه عمل عملية ختان لحفيدته اللي عمرها 8 سنين، و”حسن.أ.ا” وعمره ١٩ سنة  طالب، ومقيم في قرية سبيل العرب التابعة لمركز كوم أمبو، عشان أجرى عملية الختان للطفلة تبلغ واتسبب لها في حدوث نزيف لها.

تفاصيل القضية بترجع لأكتوبر 2021، من أول ما قدمت “منى.ج.ا” جدة الطفلة اللي عندها 8 سنين بلاغ لمركز شرطة دراو في شهر أكتوبر اللي فات وأفاد بلاغها إن حفيدتها قالتلها إنها بتعاني من ضعف بصرها بعد ما عملت عملية ختان وقالتلها إن العملية تمت عن طريق شخص جابه جدها والد أمها في المنزل، والجدير بالذكر إن الطفلة في حضانة جدتها من ناحية الأم وده بعد جواز والدتها بعد ما انفصل عن ابنها والد الطفلة.

وبسؤال الجد للأم “محمد.ع.ح” 55 سنة، وهو المتهم الأول أكد على حدوث الواقعة بتاريخ ١يونيو ٢٠٢١ وقال إنه جاب في قريتهم المنصورية التابعة لمركز دراو، شخص اسمه “حسن.أ.أ” وعنده 19 سنة، وشهرته حسن الزعيم، وبيدعي إنه دكتور وقال إنه بيعدي على بيوت القرية وبيدور على اللي عايزين يعملوا ختان لبناتهم وأقر الجد إنه طلب منه يعمل العملية للطفلة ووصف لها علاج وخد مقابل العملية مبلغ ١٥٠ جنيه.

جدة الطفلة جنى اللي في حضانتها الطفلة “سيدة.ج.ا” أنكرت إنها كانت عارفة أي تفاصيل عن العملية وبسؤال “دينا.م”، أم الطفلة قالت إنها عرفت بعد ما تمت الجراحة وده لإنها متجوزة شخص تاني وده بعد طلاقها من والد الطفلة.

وبعد ما سألوا الطفلة جنى في التحقيقات أكدت الطفلة إن جدها لوالدتها هو اللي جاب واحد وعملها عملية الختان في البيت، وبعد الكشف الطبى عليها اتضح فعلا إجراء تدخل جراحي لها من الدرجة الأولى ومفيش عاهة مستديمة نتيجة العملية.

وكان فيه حكم في قضية مشابهة من أيام برضه وهو حكمت محكمة جنايات أسوان برئاسة المستشار وائل صلاح الدين حكم بحبس دكتور جراحة عامة سنتين بتهمة ختان الإناث وكانت بداية القضية من حوالي سنة برضه بس بدأت بشكوى فى محكمة الأسرة لسيدة ضد طليقها، وحكمت المحكمة وقتها بنفقة شهرية بـ ٢٤٠٠ جنيه فكان الزوج عايز ينتقم من طليقته فعمل فيها محضر هي والدكتور “أحمد.م. ح” اللي عمل جراحة ختان لبنته بناء على رغبة والدتها لإنها فى حضانتها.

ووفقًا للكلام ده حكمت محكمة جنايات أسوان حكم بحبس الدكتور سنتين، وحبس الأم سنة، بسبب اللي عملوه عملوه بخصوص ختان الطفلة.

في النهاية خلينا نفكرك إن فيه طرق سريعة عشان تبلغ بيها وتنقذ البنات اللي بيتعرضوا لجريمة الختان ومعاقبة الجاني بالقانون والطرق دي هي:

1- الخط الساخن لمكتب شكاوى المرأة وهو 15115 اللي خصصه المجلس القومي للمرأة الشكاوى للإبلاغ والتواصل السريع مع البنات والسيدات لو اتعرضوا لأي أزمة أو مشكلة، ومن ضمنهم البلاغ عن ختان الإنات.

2- خط نجدة الطفل على رقم 1600 وده خط مجاني وأي حد يقدر يبلغ من خلاله عن حالات الختان المحتملة أو الأطباء المشاركين فيها 

3-  خط المشورة الأسرية على رقم 16021 أو  الاتصال بأقسام الشرطة أو العلاج الحر بوزارة الصحة.

4- الخط المعني بالمشورة والتوعية بأضرار جريمة تشويه الأعضاء التناسلية للإناث ممكن عن طريق الخط الساخن أو من خلال الواتس آب على الرقم 01102121600 وفقًا للمجلس القومي للطفولة والأمومة.