9 أسباب للشعر الأبيض في سن صغير وهل ممكن تقلل منه؟
بقينا بناخد بالنا إن في شباب كتير عنده شعر أبيض وهو لسه في العشرينات أو أصغر كمان.. ويمكن كنا بنستغرب ساعات لأن الشعر الأبيض مرتبط في دماغنا بالشيخوخة والسن الكبير.. بس دلوقتي الشعر الأبيض بقى نوع من الاستايل والناس اللي حتى ماعندهاش شعر أبيض بقت تحاول تصبغه عشان حاسة إن شكله حلو.. بس إيه أصلا الأسباب اللي ممكن تخلي الشعر يبيض وهل موجودة من زمان؟ عشان كده هنقولك في الموضوع ده ليه عندك شعر أبيض وفقًا لموقع DW وموقع healthline
الشيب المبكر هو تحول الشعر للون الرمادي وده بيحصل قبل سن العشرين
على الأغلب أو في التلاتينات.. والشعر الأبيض بيحصل لما بتفقد بصيلات الشعر مادة الميلانيين وهي (مادة بتحتوي على خلايا صبغية مسؤولة عن لون الشعر)..
لكن في حالة السن الصغير في أسباب تانية زي:
1- العوامل الوراثية:
لو باباك أو مامتك أو حد من قرايبك عنده شعر أبيض من سن صغير فغالبًا هيكون عامل وراثي وده حاجة مش هينفع تغيرها فحبها زي ماهي واعتبره ستايل!
2- أمراض المناعة:
الأمراض المناعية زي “الثعلبة والبهاق” .. لأن وقتها الجهاز المناعي بيهاجم الخلايا وبيحصل للمصاب فقدان لصبغة الشعر..
3-اضطراب الغدة الدرقية:
وده بيكون بسبب التغيرات الهرمونية اللي بتحصل بسبب مشاكل زي فرط نشاط الغدة الدرقية أو قصور فيها وده ممكن يأثر على لون الشعر لأن الجسم هينتج ميلانين أقل.
4- نقص فيتامين بـ 12:
فيتامين بـ 12 من أهم الفيتامينات في الجسم وهو المسؤول عن نمو الشعر الصحي ولونه وكمان بيدي الجسم طاقة.. ولما جسمك ما بيقدرش يمتص الفيتامين ده..
خلايا الشعر بتضعف.. وكمان بـ 12 بيأثر على إنتاج الميلانين هو كمان.
5- التدخين:
وفقا لموقع healthline في دراسة لقت إن في علاقة بين التدخين والشعر الأبيض المبكر قبل سن التلاتين.. لأن التدخين بيسبب أمراض كتير خطيرة وبيأثر على الأوعية الدموية وده بيقلل تدفق الدم لبصيلات الشعر وبيتم إتلافها وبيسبب كمان تساقط للشعر .
6- العوامل البيئية: زي تلوث الهواء والأشعة الفوق بنفسجية بتأثر على الشعر.
7- سوء التغذية:
والدكتور “شيتيج جول” رئيس قسم الأمراض الجلدية بيقول: إن نمط الحياة الجديدة السريع واللي بيتضمن الأكل الغير صحي بيؤدي لسوء التغذية اللي بيأثر على صبغة الشعر وقوته.
8- ومن الأسباب كمان اللي بتسبب الشيب المبكر أو (الشعر الأبيض)
هي التوتر والضغط النفسي:
في دراسة عملتها جامعة “ديوك” الأمريكية سنة 2011م لقوا إن في علاقة بتربط الشيب المبكر بالإجهاد النفسي.. والضغط الدائم بيقلل البروتين والميلانين في الجسم وبالتالي ممكن يسبب أمراض كتيرة من ضمنهم الشيخوخة المبكرة.
9- الإجهاد التأكسدي:
ووفقًا لموقع indiatoday الدكتورة “راشانا شيلباكار” استشارية الأمراض الجلدية بتقول إن الضغوط في الحياة الحديثة في الشغل وقلة النوم بيؤدي لحاجة اسمها “الإجهاد التأكسدي”وهو حالة عدم التوازن في نظام العوامل المؤكسدة والعوامل المضادة للتأكسد في الجسم.. وده بيسبب عدم توازن بين الأكسجين المنتج والمحتفظ بيه في الخلايا بتاعتنا.. وممكن يسبب أمراض خطيرة لأنه بيسبب تلف في الأعضاء والأنسجة ومنها الأنسجة الخاصة بالشعر.. وموقع skynewsarabia بيقول إن في دراسة جديدة بتقول إن عوامل البيئة اللي بتسبب “الإجهاد التأكسدي” لو تم علاجها بمضادات الأكسدة هتحافظ على جذور الشعر.
طيب هل الشعر الأبيض ممكن يتعالج؟
طبعا ماتقدرش تمنع الشيب المبكر نهائي لو عندك عوامل جينية أو وراثية لكن تقدر تتجنب العوامل اللي بتزوده يعني مثلا:
-لو عندك سبب مرضي من اللي مكتوبين فوق يبقى لازم تروح لدكتور حالاً وتعالجه عشان تحافظ على شعرك!
-ولو عندك سوء تغذية يبقى لازم برضه تهتم تاكل أكل صحي ويبقى عندك نمط حياة صحي بعيد عن الملوثات!
-لو عندك بقى قلق مزمن أو توتر لازم تبعد عن أي حاجة تحرق دمك وتوترك
وتحاوط نفسك بالحاجات اللي بتحبها!
