انتشر الفترة اللي فاتت ترند لناس يتقول إن الماتشا بتسبب سقوط شعرهم الكلام ده مش جديد لكنه رجع ينتشر تاني..

ولو انت رواد القهاوي البلدي وماتعرفش إيه الماتشا دي 

فهي نوع من أنواع الشاي الأخضر.. وأول ظهور معروف ليها كان في الصين لما كانوا بيطحنوا بذور الشاي ويحطوها في وعاء مع مياه سخنة.. وبعد كده اتنقلت لليابان عن طريق راهب بوذي وبدأوا يستخدموها في طقوس تأملية خاصة بالرهبان البوذيين.

طريقة الزراعة

الفرق بين الماتشا والشاي الأخضر في طريقة الزراعة.. فالماتشا بيتم تغطيتها قبل موسم الحصاد بـ 3 أو 4 أسابيع لحجب ضوء الشمس وده بيزود نسبة الكلوروفيل والثيانين فيها واللي بيخلي ليها لون وطعم مميزين عن الشاي الأخضر وكمان بيزود القدرة على الاسترخاء والهدوء من غير ما يسبب إحساس بالنوم.

الماتشا و GenZ

وفي السنين الأخيرة انتشر مشروب الماتشا ودخل في مشروبات كتير ووصفات أكل وبقى جزء من اللايف ستايل لناس كتير وبالذات GenZ وده اللي خلى نبات الماتشا هو الشاي الأخضر الأكثر طلبًا في العالم بحسب تقرير من CNN

الماتشا وتساقط الشعر

انتشر الفترة الأخيرة فيديوهات لناس على تيك توك بتربط بين تساقط الشعر وشربهم للماتشا وبيقولوا إنهم اكتشفوا إنها سبب تساقط شعرهم.
وبدأ ينتسر كمان فيديوهات من فترة بتتكلم عن نفس الحاجة.

@ow396i #ماتشا #ماتشا_لاتيه #لايك__explore___ #foryoupage #laik #fypシ #تساقط #تساقط_شعر ♬ Smalltown Boy – Bronski Beat

@ranavat

@skinbyshiv Heartbroken. #matcha #irondefiency #hairloss ♬ original sound – SHOTTAWORLD🌍🩸

بس هو ده حقيقي؟

الحقيقة إنه أه ولأ في نفس الوقت.. الماتشا مش بتسبب بشكل مباشر تساقط الشعر.. لكنها زي أنواع تانية من المشروبات ولأنها تعتبر نبات شاي.. فهي بتقلل امتصاص الحديد في الجسم.. وبالذات الحديد اللي مصدره النباتات أكتر من اللحوم.. لما الحديد بيقل امتصاصه ده بيؤدي لمشاكل صحية مختلفة منها تساقط الشعر وتكسر الأظافر والصداع وضعف التركيز.

يعني نبطل نشرب ماتشا؟

الماتشا ليها برضو فوايد زي انها بتدي طاقة وبتقلل التوتر وساعات كتير بتكون بديل أحسن للقهوة.. لكن عشان نبعد عن مخاطرها فالخبراء بينصحوا بـكوب واحد في اليوم تتشرب قبل أو بعد الأكل بساعة أو ساعتين عشان الجسم يمتص الحديد.

ولو انت وصلت لهنا يبقى انت بتحب الماتشا ولو شربت النهاردة يبقى كفاية عليك كده.. ماتطلبش تاني بقى