استحالة ابقى زيهم.. ليه ساعات بتكرر نفس غلطات أهلك حتى وانت مش عايز.. وتوقف ده إزاي؟

لما بتعيش تجارب صعبة مع أهلك وتراقب غلطاتهم من بعيد سواء ارتكبوها في حقك أو حتى في حق نفسهم، بتقول لما هكبر استحالة اعمل زيهم، بس رغم كده بتلاقي نفسك بتكرر كلامهم وتصرفاتهم بالملي، وعشان كده هنقولك الأسباب وإزاي تعرف فعلًا تكسر الدايرة دي؟ حسب VeryWell Mind و  The Guardians و Go Therapy

إيه أسباب تكرار غلطات أهالينا؟

1- التكرار القهري (Repetition Compulsion): هي حاجة مُلحة بشكل غير واعي لتكرار التجارب والتصرفات المؤلمة اللي عيشتها في الماضي وفشلت في إنك تحلها أو تسيطر عليها خاصة في مرحلة الطفولة.. فبتكرر سلوك معين أو بتحط نفسك في مواقف وحشة بتحاول تتجنبها أو بتكوِّن علاقات بنمط مشابه لعلاقات مؤلمة عيشتها زمان 

2- مفاهيم الحب المغلوطة (Misconceptions love): بتتكون عندك في طفولتك من أول ناس بيقدمهولك.. فلو أهلك ربطوا بين الحب والتجاهل.. عقلك بيترجم الحب بالطريقة دي بشكل لاواعي فلما بتيجي تدي الحب للي حواليك بتقدمه بالمفهوم اللي اتعودت عليه

3- التوارث عبر الأجيال (Inheritance across generations): الوراثة مابتكونش في الملامح والصفات بس، هي كمان بتبقى في التصرفات، فبيقى صعب عليك تفرق انت بتتعامل مع ابنك بتصرفات دلوقتي ولا بالتصرفات اللي ورثتها من أهلك وموجودة في ماضيك

4- التصرف الشديد سواء بالزعيق أو الغضب تجاه تصرف اللي قدامك بيكون رد فعل على ماضي صعب عيشته أو جروح داخلية اتحركت جواك بسبب تصرفه، ومش ضروري معناها إنه عمل حاجة غلط تستدعي الزعيق أصلًا

5- الصراع الداخلي: اللي بيحصل جواك بين صوت المفاهيم والتربية اللي اتربيت عليها وبين صوتك انت الداخلي اللي بيقولك الصح اللي المفروض تعمله.. وساعتها بينتصر صوت مفاهيم أهلك لأنها الأقدم وثبتت في دماغك بشكل غير واعي

6- الولاء الأسري اللاواعي (Unconscious Loyalty): بيحصل ارتباط جذوره عميقة أوي بينك وبين أهلك وبيكون بشكل غير واعي.. فبتقلد أفكارهم وتصرفاتهم حتى لو غلط وانت مش حاسس وده بيخليك تعيش نفس تجربتهم

طب وإيه الحل؟

حسب Cleveland Clinic دي شوية حلول لكسر دايرة غلطات أهلك:

• اعترف إنك مريت بصدمة كبيرة مع أهلك وشوف نفسك من خلال نفسك مش من خلال الصدمات اللي عيشتها 

• حدد آثار غلطات أهلك عليك واعرف سببتلك مشاكل عاملة إزاي عشان تقدر تعالج المشاكل دي

• ابدأ عالج المشاكل دي عشان تكسر الدايرة الموروثة من أهلك وغلطاتهم، ومكانها بدلها بأفكار وتصرفات صحية أكتر

• لو ماعرفتش تحل صدماتك لوحدك، مش عيب خالص تلجأ لدكتور نفسي يساعدك أو حتى دعم صحابك 

• حاول تسامح أهلك عشان تقدر تتخطى وتكمل حياتك والضيق يخف فتعرف تتغير فعلًا وماتبقاش نسخة منهم

• خليك عايش في اللحظة نفسها مع اللي حواليك؛ عشان تاخد بالك انت بتتصرف معاهم بمعتقداتك انت ولا معتقدات وأفكار أهلك

• ماتقفش لنفسك على الواحدة ومحدش معصوم من الغلط، المهم إنك لو غلطت تحاول تقلل غلطاتك مع اللي حواليك

وفي الآخر اعرف إن كلنا في الدنيا جايين لأول مرة عمالين نجرب وبنشوف الصح والغلط، فماتبقاش قاسي ولا على أهلك ولا على نفسك، وكل حد ليه تجربته ومش ضروري خالص تعيش نفس مصير أهلك، المهم إنك تاخد قرار التغيير وتطبقه