من 240 كيلو للاعب محترف وصانع محتوى مؤثر.. قصة الجزائري أمينو
مش كل نجوم الكورة لازم يلعبوا في أكبر الملاعب.. ومش كل قصص النجاح بتبدأ من أكاديمية أو نادي كبير.. أحيانًا كل اللي بتحتاجه هو شغف حقيقي وإصرار تثبت لنفسك وللناس إنك تقدر تحقق اللي بتحلم بيه مهما كانت الظروف.
وده بالظبط اللي قدر يعمله أمين بلحاج.. المعروف باسم «أمينو»، الشاب الجزائري الألماني اللي بدأ رحلته بوزن وصل لـ240 كيلو.. بس قدر يحوّل حبه لكرة القدم لقصة نجاح ملهمة.. وبقى واحد من أشهر صناع المحتوى الرياضي على السوشيال ميديا بجمهور بالملايين من مختلف أنحاء العالم.
من 240 كيلو لمعركة تغيير الحياة
قصة أمينو مش مجرد حكاية شخص قرر يخس.. لأن معاناته مع الوزن بدأت من طفولته.. بسبب مرض وراثي متعلق بعملية التمثيل الغذائي.. وده خلاه يواجه زيادة كبيرة في الوزن رغم اهتمامه بالحركة وممارسة كرة القدم.
ومع الوقت.. الموضوع ماكانش جسدي بس.. بس امتد للتنمر والسخرية اللي اتعرض ليها في المدرسة.. لدرجة إن حبه للكورة كان أحيانًا بيتأثر بنظرات وتعليقات الناس.
بس أمينو قرر مايسيبش الظروف دي تحدد مستقبله.. وعمل لجراحة لإنقاص الوزن.. وبدأ مرحلة جديدة من الالتزام وتغيير نمط حياته.. وقدر يخسر حوالي 100 كيلو من وزنه.
واللافت إنه ماخلاش الرحلة دي مجرد تجربة شخصية.. لكنه قرر يوثقها قدام الناس.. ويشارك تفاصيل التغيير والتحديات اللي قابلته.. وده ساعد ناس كتير تتابعه مش بس عشان مهاراته الكروية.. لكن كمان عشان قصته.
فيديو واحد غيّر كل حاجة
رغم إن أمينو كان بيلعب كرة قدم من وهو طفل.. بداية شهرته الحقيقية على الإنترنت كانت سنة 2022.. لما قرر يصور مهاراته بالكرة وينشرها على تيك توك.
الفيديوهات بدأت تنتشر بشكل كبير.. خصوصًا إن الناس ماكنتش متوقعة تشوف المهارات والتحكم في الكرة بالشكل ده.. وواحد من فيديوهاته وصل لـ120 مليون مشاهدة!
ومن هنا بدأت قصة شخصية أمينيو
