لاعبين ومدربين ممكن نتابعهم في كأس العرب 2025
أغلبنا مستنيين نشوف بطولة كأس العرب اللي هتبدأ النهاردة 1 ديسمبر.. عشان نشوف لاعبين ونجوم جديدة على الساحة العربية لأن البطولة دي وخاصة النسخة دي بالتحديد بتدي فرصة للاعبين يظهروا دوليًا مع منتخباتهم وممكن يبقى ليهم شأن كبير قدام
” ذا جلوكال” هتقدملك دليلك لـ “أبرز اللاعبين” اللي ممكن يتألقوا في بطولة كأس العرب 2025 والمتوقع تألقهم بشكل كبير.
1- أبرز اللاعبين في كأس العرب 2025
البداية هتكون مع الجزائري “عادل بولبينة” لاعب نادي الدحيل القطري وواحد من أبرز المواهب العربية القادمة بقوة ولو متعرفش كان مرشح بقوة للانضمام للأهلي والزمالك الصيف اللي فات.
بولبينة عنده 22 سنة و بيقدم موسم حلو مع الدحيل وشارك في 17 لقاء وسجل 8 أهداف وصنع 5.. وده في أول موسم بعد انتقاله من “بارادو الجزائري” في صفقة ممكن تكون الأغلى بين اللاعبين العرب في إفريقيا وحسب التقارير بلغت 7 ملايين يورو.
ومن الجزائر نروح لتونس واللي بتدخل البطولة بالقائمة الأساسية وهنا كلامنا هيكون على “إسماعيل الغربي” موهبة صاعدة بقوة في الكرة التونسية.
الغربي عنده 21 سنة وكان من ناشئين باريس سان جيرمان الفرنسي وقائد للفريق لحد ما اتباع في 2024 لسبورتنج براجا البرتغالي وحاليًا معار لفريق أوجسبورج الألماني.
في تونس الكل شايف أن الغربي مستقبل كبير لوسط ملعب المنتخب وأنه قدر يخطف الأضواء في وقت قليل خاصًة إنه انضم لأول مرة في شهر 9 اللي فات مع مدرب المنتخب الأول “سامي الطرابلسي” وبقى أساسي بشكل دايم معاه.
ونيجي للسعودية اللي داخلة البطولة بالفريق الأول لكن العين كلها هتكون على “صالح أبو الشامات” لاعب أهلي جدة واللي بيتلقب بـ “ميسي السعودية” وهو جناح أيمن وأيسر .
الشامات عنده 23 سنة و كان تريند من شهر لما السعودية اتأهلت رسميًا لكأس العالم وفي لقطة شهيرة كان “هيرفي رينارد” مدرب الأخضر بيبوس إيد الشامات لما قدم ماتشين حلوين قدام أندونيسيا والعراق وساهم في تأهل السعودية للمونديال.
ولأن البطولة دي مختلفة فـ المواهب اللي هتشارك فيها كتير ومن ضمنهم “زيدان إقبال” لاعب وسط العراق واللي كان في ناشئين مانشستر يونايتد.
إقبال عنده 22 سنة وبيلعب دلوقتي في نادي أوتريخت الهولندي بعد ما اتباع من اليونايتد في 2023 ولقب بـ “زيدان” على اسم أسطورة فرنسا السابق “زين الدين زيدان” وطريقة لعبه اللي قريبة منه.
ونيجي للمغرب.. واحدة من المنتخبات المرشحة لـ اللقب برضه وهنا يظهر اسم لاعب محلي متألق اسمه “محمد ربيع حريمات” وهو لاعب وسط فريق الجيش الملكي.
حريمات يمكن يكون الأكبر سنًا في الأسامي اللي فاتت “31 سنة” بس هو لاعب قوي وعنده روح كبيرة في وسط المغرب.
المدرب “طارق السكتيوي” بيعتمد عليه بشكل كبير.. وكان اتألق في بطولة أمم إفريقيا للمحليين اللي كسبتها المغرب في أغسطس 2025 على حساب مدغشقر في النهائي وساعتها حريمات خد أفضل لاعب في البطولة.
2- أبرز المدربين في كأس العرب 2025
في بطولة بحجم كأس العرب 2025، الأضواء مش بس على اللاعبين لكن على العقول اللي بتصنع الفارق من على الخط.
المدربين هنا هما أصحاب البصمة الحقيقية “ذا جلوكال” هيقدّم لكم أبرز المدربين اللي منتظر منهم يسيبوا بصمة كبيرة في نسخة 2025 في مزيج بين الخبرات والشباب.
“طارق السكتيوي” مدرب منتخب المغرب هو اللي نقدر نقول بيتصدر المشهد في البطولة.. بإدارة مميزة لمنتخب قدر يطلع لاعبين بقوا حديث إفريقيا الفترة اللي فاتت.
السكتيوي من أبرز المدربين في المغرب وقدر يكسب شعبية كبيرة بعد نجاحات كان أولها كأس الكونفدرالية مع نهضة بركان في 2019 وبعدها الميدالية البرونزية في أولمبياد باريس 2024 بعد فوز كبير على مصر بنتيجة 6-0.
وقدر يكلل كل المجهود ده بفوز تاني مع المغرب ببطولة أمم إفريقيا للمحليين 2024 واللي اتلعب في صيف 2025.
الفرنسي”هيرفي رينارد” مدرب السعودية في كأس العرب يعتبر من أبرز المدربين الأجانب في البطولة وده بحكم خبراته الكبيرة في البطولات الكبيرة والدولية بشكل عام.
رينارد بيقود السعودية في ولاية تانية من أكتوبر 2024 بعد رحيله لتدريب منتخب فرنسا للسيدات في مارس 2023.. ونجح إنه يتأهل بالأخضر لكأس العالم.
والمدرب الفرنسي عنده خبرات كبيرة في البطولات المجمعة وقدر يكسب كأس الأمم مرتين مع زامبيا وكوت ديفوار.
ومع المدربين العرب بيظهر “جمال السلامي” المدير الفني للأردن وواحد من المدربين اللي أثبتوا كفاءتهم بعد قيادته الأردن للتأهل لكأس العالم 2026 لأول مرة في تاريخها.
المدرب المغربي جه بعد مواطنه “الحسين عموته” بعد بطولة آسيا في 2023 عشان يكمل مسيرة المدربين الأجانب الناجحين في تاريخ الأردن واللي كان أبرزهم أسطورة التدريب المصري “محمود الجوهري”.
وبيدخل منتخب البحرين “بطل كأس الخليح” النسخة اللي اسمها “خليجي 26” مع الكرواتي “دراجان تاليتش” واللي قدم أوراق اعتماده بشكل كبير بعد التتويج بالبطولة بمباريات كبيرة أمام أكبر المنتخبات العربية.
تاليتش من المدربين الخبرات في المنطقة العربية وعنده علم كبير بمعظم فرق البطولة واللي فاز على أتقلهم في بطولة الخليج زي العراق.. السعودية.. الكويت وكمان عمان في النهائي.
واستكمالاً للمدربين العرب بيظهر “سامي الطرابلسي” مدرب تونس بقائمة كاملة وأساسية من الفريق الأول واللي كسب احترام الجميع من بعد ما تولى تدريب نسور قرطاج.
الطرابلسي قدم تصفيات رائعة مع تونس من غير ما يدخل شباكه أي جون.. كمان قدم مباراة كبيرة ومشرفة للكرة العربية قدام البرازيل قد يخرج بها بتعادل كان صعب على نجوم السامبا.
3- فانتازي كأس العرب 2025
ولو إنت من محبّي أو عشّاق الفانتازي.. فـ بطولة كأس العرب 2025 جاية ومعاها تجربة مختلفة تمامًا.. تجربة هتخليك تعيش دور المدير الفني كل يوم!
البطولة اللي هتتجمع فيها أفضل المنتخبات العربية في قطر، بقت مش مجرد مباريات وخلاص لأ، دي بقت ملعب مفتوح للّعبة فانتازي جديدة معمولة مخصوص لكأس العرب، علشان تختار تشكيلتك وتنافس أصحابك
فانتازي كأس العرب عبارة عن لعبة يومية بتختار فيها 7 لاعبين من المنتخبات المشاركة في البطولة.
اللاعب اللي تختاره بياخدك نقاط على قدّ اللي بيعمله في الملعب يعني: يسجل، يصنع، يصد، يطلع بشباك نظيفة, يعمل تدخلات أو يكسب رجل المباراة, كمان تقدر تختار أتنين يكسبوا ضعف النقاط ويكونوا الكابتن للجولة.
