في شهر التوعية به.. إيه هو سرطان عنق الرحم وأسبابه وأعراضه؟
يناير هو شهر التوعية بسرطان عنق الرحم.. وحسب منظمة الصحة العالمية فده سادس أكتر أنواع السرطانات المنتشرة بين الستات.. عشان كده هنقولك عن أعراضه وأسبابه اللي أهمها فيروس الورم الحليمي البشري وطرق الوقاية منه كمان
- عنق الرحم هو الجزء السفلي من الرحم اللي بيوصل الرحم بالمهبل.. وسرطان عنق الرحم بينشأ نتيجة نمو غير طبيعي للخلايا المكونة للجلد اللي حوالين المنطقة دي
- بييجي للستات اللي أعمارهم بين 35 و44 سنة ودول الأكثر عرضة للإصابة بيه.. بس أكتر من 15% من الحالات الجديدة بيتصابوا بيه فوق سن 65 سنة
- من أشهر أسبابه الإصابة بفيروس الورم الحليمي البشري (HPV) ودي عدوى بتلقطها المرأة من خلال الاتصال الجنسي.. ووقت الإصابة بيه الجهاز المناعي بيحاول يمنع الفيروس من أي أضرار يسببها للجسم وعند معظم الناس بينجح في ده.. بس فيه نسبة صغيرة بيحصلهم تغيرات في خلايا عنق الرحم من الناس فبتتحول لخلايا سرطانية
سرطان عنق الرحم بتختلف أنواعه حسب نوع الخلية اللي بدأ السرطان يظهر فيها.. ودي أنواعه:
1- سرطانة حرشفية الخلايا: النوع ده بيبدأ في الخلاياي الرقيقة المسطحة اللي اسمها “الخلايا الحرشفية” ودي الخلايا اللي بتبطن الجزء الخارجي من عنق الرحم.. ومعظم سرطانات عنق الرحم بتبقى من النوع ده
2- السرطان الغدي: النوع ده بيبدأ في الخلايا الغدية عمودية الشكل.. ودي الخلايا اللي بتبطن قناة عنق الرحم
ونادرًا أوي لما بيحصل السرطان في خلايا تانية موجودة في عنق الرحم.. ودي مراحله:
المرحلة الأولى: بتكون فيها الخلايا السرطانية في عنق الرحم بس
المرحلة التانية: السرطان فيها بينتشر برا عنق الرحم ووصل لجدار الحوض
المرحلة التالتة: بيكون السرطان انتشر في الجزء السفلي من المهبل.. وممكن يوصل للعقد الليمفاوية القريبة وجدار الحوض
المرحلة الرابعة: السرطان فيها بينتشر في المستقيم أو المثانة أو أجزاء تانية من الجسم
1- إفرازات مائية أو فيها دم وممكن ريحتها تبقى كريهة
2- نزيف مش متعودة عليه.. بمعنى إنه نزيف بيحصل بين فترات الحيض أو نزيف بعد ما تعملي أي تمارين رياضية
3- فترات الحيض مدتها بتطول عن العادي أو غزيرة أكتر من الطبيعي
4- ألم عند التبول
5- نزيف في المستقيم أو ألم فيه
6- تورم في الساقين أو آلام في الضهر
7- فقدان الوزن والشهية والإحساس بالإرهاق
الأعراض اللي قولنا عليها لو طولت لأكتر من أسبوعين لازم تستشيري دكتور نساء وتوليد.. وبتعملي الإجراءات دي:
1- فحص عينة مسحة عنق الرحم: ودي بيعملها الدكتور بإنه ياخد مسحة من الخلايا الموجودة على سطح عنق الرحم بعود قطني.. وتتفحص في المعمل عشان يدوروا على أي تغيرات أو علامات سرطانية
2- منظار للمهبل وعنق الرحم: وده في حالة لو الدكتور لقى في مسحة عنق الرحم تغيرات
3- اختبار الحمض النووي للورم الحليمي البشري: وده الدكتور بيدور في الـ DNA بتاع خلايا عنق الرحم.. وبيتأكد منه لو المرأة محتاجة اختبارات أكتر للتشخيص ولا لأ.. وبعدها بييجي دور فحوصات الدم والبول ووظائف الكلى والكبد.. وأشعة سينية للأعضاء القريبة من الرحم
علاج سرطان عنق الرحم الدكتور بيحدده حسب مرحلة السرطان والعمر وعوامل تانية.. والتشخيص المبكر ليه بيخلي علاجه سهل من خلال إزالة الأنسجة السرطانية بس.. ودي طرق علاجه:
1- العلاج بالإشعاع: اللي له طريقتين.. طريقة بيتحط فيها الجهاز بالقرب من السرطان.. والتانية بيكون جهاز خارجي بيبعت إشعاعات للمنطقة المحددة بالظبط
2- العلاج الكيميائي: وفيه حالات معينة المريض بيحتاج ياخده مع العلاج الإشعاعي
3- العلاج الجراحي: زي الجراحة بالليزر بإنه يحرق الخلايا السرطانية.. أو استئصال الرحم بس أو الرحم كامل ومعاه جزء صغير من المهبل والغدد الليمفاوية في الحوض
1- تطعيم البنات من سن 9 سنين لـ 14 سنة ضد فيروس الورم الحليمي البشري
2- فحص منتظم للكشف عن فيروس الورم الحليمي البشري وده بتعمله المرأة من سن 30 سنة.. والسيدات اللي نتيجة فحصهم بتكون سلبية لازم يعملوا الفحص مرة تانية كل 5 لـ 10 سنين
3- فحص مسحة عنق الرحم بشكل دوري بمجرد ما البنت تتم 21 سنة عشان تلاحظ أي تغيرات في عنق الرحم بدري
4- النساء المصابين بفيروس العوز المناعي البشري لازم يعملوا فحص لفيروس الورم الحليمي البشري كل 3 سنين من بداية سن 25 سنة
5- التوقف عن التدخين لتقليل التعرض للمواد المسرطنة
وفي الآخر ماتهمليش أي عرض مخليكي مرهقة أو تعبانة وتتلهي في مشاغل الحياة ومسؤولياتها.. افتكري إن صحتك هي اللي بتديكي القوة عشان تقفي على رجلك وتعملي المسؤوليات دي
